DILI, STLTIMORLESTE.com – Ekipa Kuadrirateral kompostu husi KAK, PDHJ, IGE, CFP, halao vizita supreza ba iha Institutu Nasional Farmasia no Produtu Mediku (INFPM), hodi haree kona-ba sira nia servisu durante nee.
“Objetivu vizita nee atu haree no rona preokupasaun povu no politiku sira nian iha Parlamentu Nasional, atu haree kondisaun INFPM nia aimoruk oinsa, no servisu atendimentu lao oinsa,” dehan Komisariu KAK, Rui Pereira ba jornalista sira iha Kampu Alor, Tersa (26/11/2024.
Nia hatutan, iha vizita nee Diretor sira nee ida mak hatoo katak, ba oin Governu tenke hanoin oinsa kria dekretu lei ruma kona-ba aprovizionamentu espesial ba kompras medikamentus nian, atu nunee bele fasilita servisu, liu-liu tratamentu aimoruk bele sai diak liu tan.
“Planu husi Diretor INFPM nian katak, ba oin sei halo estudu, atu nunee tinan hirak tuir mai rezultadu estudu hatudu pozitivu, aimoruk balu neebe mak nia material baziku iha Timor iha, bele mos ita nia kompanhia balu bele halo produsaun iha rai laran,” nia tenik.
Nia katak, papel KAK nian mak atu prevene krime korupsaun, tanba nee hasoru malu ho kargu xefia sira, rona servisu neebe sira halao.
Iha fatin hanesan, Diretor Ezekutivu (INFPM, Virgido Simiao De Deus dehan, agora ema ladun kestiona kona-ba stok out aimoruk.
“Agora ema ladun kestiona kona-ba stok out, lo-loos nee stok aimoruk laos ita haree deit iha INFPM, tanba INFPM nia sasan ohin tama mai aban bele sai tiha kedan,” dehan nia.
Ezemplu, stok 25% la permanente ida, haree mos iha baze, hanesan stok out iha Munisipiu sira hira, simu informasaun katak maioria menus 15% stok, no iha HNGV iha 11 no 12%, nee situasaun normal.
Nia sublina tan, iha sentru sira mak situasaun diak hela, stok menus sira esforsu nafatin atu bele prienxe fila fali sasan sira neebe menus, importante mak iha baze tenke stok iha, durante nee nivel nasional situasaun lao diak hela.
(ter)
