DILI, STLTIMORLESTE.com – Atendimentu kona-ba pasaporte nian lao normal, no tuir estimasaun neebe iha, stok kaderneta pasaporte sei bele utiliza too iha fulan Dezembru bele mos too iha fulan Fevereiru.
Tuir Diretor Rejistu Notariadu, Agustinho Gonsalves Viera katak, atendimentu kona-ba kaderneta pasaporte kontinua lao normal.
“Atendimentu pasaporte lao normal no stok kaderneta pasaporte tuir estimasaun neebe iha bele too iha fulan Dezembru no bele too tan iha fulan Janeiru ka Fevereru tinan oin,” dehan Diretor ba jornalista STL iha Mandarin, Segunda (21/07/2025).
Nia hatutan, kona-ba ajendamentu online kontinua lao normal, sira neebe rejista ona trata pasaporte tuir loron neebe sira hili ona. Maibe la taka dalan ba sira neebe la rejista online, hanesan ferik katuas no sira neebe halao servisu urjente ruma kontinua atende.
Esplika tan, atu asegura banhira kaderneta pasaporte sira nee remata atu labele hamosu preokupasaun, oras nee daudaun sira mos iha ona planu atu halo tan akizasaun ba kaderneta pasaporte hamutuk 10 mil, hodi nunee asegura hela bainhira stok remata bele utiliza fali sira nee.
Hatan kona-ba atendimentu ba trabalhador sira iha Australia, nia parte dehan besik finaliza ona no la iha tan ona preokupasaun ruma.
Informa tan ba publiku sira neebe hakarak trata pasaporte bele ba iha Notariadu, tanba atendimentu lao normal, no funsionariu sira mos halao servisu tuir oras neebe iha hodi atende publiku sira.
Iha fatin hanesan, Estudante Mario Dos Santos dehan, atendimentu kaderneta pasaporte lao diak tebes, tanba se mak trata remata bele selu kedan iha nee.
“Uluk ita trata remata sei ba selu iha banku, maibe agora la iha bele selu kedan iha nee, espera ba oin mantein nafatin ho sistema neebe iha,” dehan nia.
Reforsa, importante mak funsionariu sira halao knaar tuir regra neebe iha no fo atendimentu ba ema hotu hanesan atu labele mosu preokupasaun iha sosiedade nia leet.
(ter)
