BAUKAU, STLTIMORLESTE.com – Stok sumbriña ou komdom neebe atu prevene virus hadaet sira bainhira halao relasaun seksual, iha Hospital Rejional Eduardo Ximenes (HoREX) Baukau sufisiente.
Konselhor HIV-SIDA iha HoREX Baukau, Enfermeiru Sabino Carvalho esplika, “sumbrina” ou komdom nuudar material ida mos atu evita virus ou moras transmisaun sira husi sidadaun afetadu ba sidadaun seluk bainhira halao relasaun seksual, maibe durante nee konselhor HIV-SIDA iha HoREX Baukau liu husi nia atendimentu no korajem ba pasiente sira atu utiliza komdom iha relasaun seksual, maibe pasiente balun lakohi, tanba moe.
“Ita iha komdom, ita nia pasiente STI sira mai ami tawar sira atu uza, mais balun simu balun sente moe lakohi simu, neebe tergantung ba ema ida ida nia konsiesia atu uza buat sira nee,” hateten Sabino Carvalho ba jornalista sira iha knaar fatin HoREX Baukau, Kuarta (06/08/2025).
Nia haktuir, durante fo konsulta saude ba pasiente sira neebe hetan daet husi virus Sexsual Transmision Infection (STI), Hepatites, Sifilis no HIV, sempre fo hanoin ba pasiente sira, bainhira nesesita atu halao relasaun seksual tenke utiliza komdom “sumbrina” nunee virus hirak nee labele hadaet tutan, maibe pasiente balun tauk no moe atu simu.
Nia sublina, STI, Hepatites, Sifilis no HIV hadaet nee liu husi relasaun seksual, tanba nee presizamente pasiente sira no sidadaun seluk sira hotu nia konsiesia ba asuntu nee hodi prevene virus hirak neebe temi.
“Virus sira nee hadaet ba ema seluk so liu husi dalan relasaun seksual, neebe presizamente ita nia konsiesia ba ida nee evita aan konsiensia moral adopta ba ida nee,” Sabino Carvalho akresenta.
Konselhor HIV-SIDA iha HoREX nee deklara, hanesan konselhor ba virus hadaet sempre fo hanoin ba pasiente sira atu tuir oreintasaun neebe atur ona, maibe atu utiliza no halo tuir metodu neebe esplika ba pasiente sira, nee konsiensia moral ema ida idak nian, tanba virus hadaet neebe durante nee HoREX rejistu numeru aas liu virus sira seluk hanesan Hepatites, Sifilis no HIV mak Sexsual Transmision Infection (STI) neebe hadaet ba pasiente sira liu husi relasaun seksual.
Atu prevene kazu virus hadaet sira parte HoREX hatene deit mak fo tratamentu ba sidadaun afetadu sira, maibe atu fo hanoin no koinhesementu ba sidadaun sira atu preve virus hadaet sira hanesan Hepatites, Sifilis, HIV no Sexsual Transmision Infection (STI), nee parte Servisu Munisipal Saude Baukau mak tenke esforsu liu husi siensebelizasaun no desiminasaun nunee sidadaun sira iha koinhesementu preve virus hadaet sira liu husi relasaun seksual.
Liga asuntu nee, STL tenta komfirma Diretor Servisu Munisipal Saude Munisipiu Baukau, maibe laiha knaar fatin atu fo komentariu, tanba sei tuir hela atividade balun iha fatin seluk..
(tom)
