DILI, STLTIMORLESTE.com – Ministeriu Publiku (MP) iha alegasaun ba krime Arma Branka no Ofensa Integridade Fizika Simples, solisita ba iha Tribunal atu kondena arguidu inisial RJdJX, tanba komete krime hasoru lezadu inisial RdSX.
Iha alegasaun nee Prokurador Bartolomeo de Araujo deklara katak, primeiru arguidu nega ba faktus neebe iha, depois rona tiha sasin sira, arguidu konfesa ba faktus.
Tanba nee MP mantein ho akuzasaun neebe iha, katak arguidu pratika duni krime Arma Branka no Ofensa Integridade Fizika Simples.
MP deklara, husu Tribunal atu verifika iha sistema, tanba antes nee arguidu mos komete ona krime lori mai iha Tribunal no desizaun sai ona.
Prokurador prosesu deklara, se iha sistema mak identifika kastigu ida neebe uluk Tribunal aplika iha hela periodu suspensaun, husu Tribunal deside tan ho prosesu ida nee atu aplika pena efetivu ba arguidu. Se desizaun ida uluk mak Tribunal la aplika pena ruma mak desizaun ba prosesu nee husu atu aplika pena suspensaun.
Rona tiha alegasaun, Tribunal adia ba loron seluk hodi rona desizaun.
Iha indisus katak, iha loron 24 fulan Maiu tinan 2023, ofendidu ho nia kolega Atejo sae motor husi Baukau mai too iha terininal Bekora sira para sosa bee hodi hemu.
Derepenti deit arguidu mosu mai hasai katana maubeka ida husi jaket laran taa kedas ofendidu, maibe la kona tanba hakruk hases aan tiha, nunee katana monu tiha, maibe arguidu hodi tan fali katana ida seluk husi jaket laran taa kona iha lezadu nia kabas sorin los too kanek no raan.
Haree situasaun ida nee, ofendidu nia kolega Mario hodi fatuk ida tuda arguidu maibe la kona, tanba nee arguidu halai dirije fali ba Mario atu taa tan nia, maibe ema barak mak hakilar no sai mai, nunee arguidu mos tauk halai tiha.
La kleur deit Polisia too kedas iha fatin akontesimentu, balu buka tuir kedas arguidu hodi kaer no detein no balu tula lezadu ho nia kolega Mario ba iha Esquadra Kristu Rei hodi rekolha informasaun.
Lezadu la ba halo tratamentu iha Hospital, maibe halo kurativu iha uma deit, tanba kanek ladun grave.
Ho nunee, arguidu hanesan autor material ho forma konsumadu, hodi pratika konkursu real krime Armas Brankas no Ofensa ba Integridade Fizika Simples nebe tuir lei numeru 5/2017, 19 Abril no artigu 145 husi Kodigu.
Audensia julgamentu nee, prezide husi Juiz Kolektivu, Jumiati Freitas, Jose Quintao, Juiz Estajiadu nain ida, Ministeriu Publiku reprezenta husi Prokurador Bartolomeo de Araujo, arguidu hetan asistensia legal husu Defensor Publiku Fernando De Carvalho.
(ter)
