DILI, STLTIMORLESTE.com – Subsidiu no salariu ba profesores 498 neebe koloka iha faze datoluk nian, daudaun Ministeriu Finansas prosesa ona ba iha sira idak-idak nia konta bankaria.
Liafuan nee haktuir husi Diretora Rekursu Umanu iha ME, Anita Tavares Ribeiro de Jesus ba STL iha nia knaar fatin Vila Verde, Kuarta (18/12/2024).
“Subsidiu nee ita prosesa ona ba iha Ministeriu Finansas, nee duni iha Dezembru ida nee ita sei halo pagamentu ba ita nian profesores hamutuk 498 neebe mak ita koloka ona iha faze datolu nian, tanba nee simu lai ba mak ita haree. Pagamentu iha ona Ministeriu Finansa, hein para ita nian profesores simu deit ona iha idak-idak nia konta bankaria,” tenik nia.
Anita hatutan, hein deit ohin, aban, bainhira salariu tama ona, nee sira nian subsidiu mos tama ona iha sira idak-idak nian konta bankaria, simu sira nian subsidiu kolokasaun no subsidiu espesial, nee ba profesores faze datolu nian, tanba faze primeiru segundu simu ona.
(jac)
