Subsidiu Ba Xefia Sesante Hein Orsamentu

DILI, STLTIMORLESTE.com – Prosesu verifikasaun dadus ba kargu xefia sesante sira husi eskola finaliza ona, maibe hein orsamentu para bele halo pagamentu.

“Subsidiu transporte ba kargu xefia sesante sira, ita seidauk halo prosesu pagamentu retroativu ba sira nian kargu. Neebe hahu husi dekretu lei 31 vigora, komesa husi fulan Junhu tinan 2023, ita halo kontajen hotu ona, ita hatama iha planu orsamentu, espera katak ita bele halo pagamentu fazeada, se orsamentu iha ita paga dala ida, se laiha nee direitu ema ida nian ou funsionariu ida nian ho ninia despaisu, nee ita sei selu, nee duni direitu ida nee sei la lakon, katak fazeada atu selu dala ida ou fazeadamente nee konforme orsamentu neebe preve,” dehan Diretora Rekursu Umanu iha ME, Anita Tavares Ribeiro de Jesus ba STL iha Vila Verde, Kinta nee (17/10/2024).

Nia hatutan, direitu ida nee sei la lakon, tanba ida nee sira nian direitu, nee duni sira halo prosesu hotu ona, espera orsamentu nee bele too para bele halo pagamentu ba sira nian direitu ba retroativu, subsidiu ba kargu neebe mak too agora sira seidauk hetan direitu ida nee.

Nia dehan, nee mos sei halo kontajen, tanba sei haree didiak sira nian finanseira neebe mak sistema finansas kaer para atu chek, bele haree iha neeba, atu nunee bele hatene katak sira simu hira, balun simu montante uza dekretu lei tuan nee haree, buat sira nee mak sira presiza halo verifikasaun, no daudaun nee finaliza ona, hein deit iha osan para bele halo pagamentu ba sira.

Iha fatin seluk, Eis Diretor EBC Fatumeta, Feliciano Gusmao hatete, osan kona-ba kargu xefia nee too agora sira seidauk simu ida, maske sira ezije nafatin, maibe husi ministeriu dehan hein deit orsamentu, se lae adia ba tinan oin.

(jac)