DILI, STLTIMORLESTE.com – Subsidiu kolokasaun inisial ba profesores neebe koloka ona iha faze primeiru no faze segundu, sei halo pagamentu iha fulan Novembru, tanba despaisu husi Komisaun Fungsaun Publiku (KFP) tun ona ba Ministeriu Finansas (MF).
Lia hirak nee hatoo husi Diretora Rekursu Umanu iha Ministeriu Edukasaun, Anita Tavares Ribeiro de Jesus ba STL iha nia knaar fatin Vila Verde, Kuarta nee (30/10/2024).
“Ami halo hotu tiha ona, nee duni fulan Novembru tinan nee halo ona pagamentu, tanba despaisu husi KFP tun ona ba MF, hodi bele halo pagamentu ba ita nian profesores neebe mak ita halo kolokasaun iha primeiru no segundu faze ninia, direitu ida nee sira hotu neebe koloka nee sei hetan hotu, tanba ida nee sira nian direitu atu hetan osan ida nee, subsidiu kolokasaun inisial nee ba sira hotu, nee dala ida deit,” nia afirma.
Anita hatutan, subsidiu kolokasaun inisial nee ba sira hotu kedas, nee ba profesores neebe halo kolokasaun iha faze primeiru no faze segundu ninia, nee sira hetan hotu ida nee, tanba nee ema nian diretu, tanba nee husi ME haruka tiha ona ba KFP, no husi KFP hatun ona despaisu ba MF hodi bele halo pagamentu ba profesores sira iha fulan Novembru nia laran.
(jac)
