DILI, STLTIMORLESTE.com – Subsidiu transporte ba profesores sira, ida nee kada fulan pakote kedas ho salariu dala ida.
“Hau hanoin kada fulan ho kedas subsidiu transporte, nee duni subsidiu transporte nee kada fulan pakote kedas ho salariu. Kona-ba profesores neebe mak antes nee ministeriu koloka ona, teknikamente hau seidauk koalia kona-ba ida nee, tanba hau sei konfirma ho superior sira, oinsa profesores neebe hela iha area remotas liu-liu kona-ba sira nian fatin neebe sira uza hodi halao knaar iha eskola idak-idak,” dehan Diretor Nasional Rekursu Umanus ME, João Amaral ba jornalista STL iha nia knaar fatin ME, Kinta nee (24/04/2025).
Iha fatin seluk, Feliciano Gusmão hanesan Profesor husi EBC Fatumeta dehan, kona-ba subsidiu transporte ba profesores tama hotu ona, tanba kada fulan profesores hetan subsidiu US$ 25 neebe mak tama kedas ho salariu dala ida deit.
“Hau hanoin subsidiu transporte fulan sempre tama hamutuk ho salariu, kada fulan US$ 25, transporte nian nee kada fulan tama hamutuk kedas ho salariu. Ida nee hanesan ajuda ida hodi hamenus nesesidade nian, hodi halao servisu nuudar funsionariu publiku,” nia afirma.
(jac)
