DILI, STLTIMORLESTE.com – Xefe Suku Bairo-Pite hatoo agradesimentu ba Governu liu husi Sekretariu Estadu Asuntu Toponomia no Organizasaun Urbana (SEATOU), tanba bele halo planu neebe diak hodi hadia Estadu Timor Leste sai nasaun dezenvolvidu no modernu.
“Hau hanesan Xefe Suku Bairo-Pite agradese ba SEATOU nia prezensa mai iha suku refere, liu-liu atu halo dezenvolvimentu ba setor infraestrutura nian, liu-liu alrgamentu estrada, hahu husi aldeia tolu (3), aldeia 5 Outubru, Weedalak no Haburas, husu ba komunidade atu koopera no agradese ba Governu hodi halo nia servisu ba dezenvolvimentu nasional,” dehan Xefe Suku Bairo-Pite, Joaninha Alves Soares ba jornalista sira iha Manleuna area Fatumeta, Dili, Kinta (23/01/2025).
Autoridade Lokal nee agradese, tanba antes Governu mai hasai komunidade, sira hahu loke dialogu oinsa Komunidade sira bele hatoo lamentasaun ruma, maibe ohin komunidade iha aldeia tolu (3) mai hotu, hodi hatoo ona sira nia preokupasaun sira, liu-liu hasai komunidade, Governu halo indemnizasaun ou lae, maibe ohin haree katak komunidade sira iha Suku Bairo-Pite, aldeia tolu koopera duni Governu atu halo nia servisu.
Komunidade sira ohin rona ona katak prosesu atu halo indemnizasaun sei la lakon, signifika Governu garante atu selu, maibe presiza iha provas hodi komprova katak uma nain duni no rai nain duni, no hela fatin iha dokumentu kompletu, hafoin Governu halo indemnizasaun, kuandu dokumentu la kompletu presiza kompleta hafoin simu ka rembolsu husi estadu.
Iha sorin seluk, komunidade iha Suku Bairo-Pite, Aldeia Weedalak, Atanasio Brites Amaral dehan, nuudar komunidade sempre koopera ho Estadu TL, liu-liu Governu atu hadia rai nee ami konkorda, maibe povu neebe hela iha rai nee iha direitu atu hela iha rai estadu nian, maibe kuandu estadu hasai ona tenke kria kondisaun dignu ruma, nunee bele sustentabiliza fali ba nesesidade komunidade nian.
Tanba ezijensia komunidade laos diskorda Governu nia planu ba dezenvolvimentu nasional, maibe husu ba Governu, liu-liu MOP no SEATOU atu hasai ema ho dignu, trata ema ho dignu, kria kondisaun neebe asesivu no kredivel ba komunidade, bainhira sai bele uza hodi nesesita ba moris.
Aleinde nee Sekretariu Estadu Toponomia no Organizasaun Urbana (SEATOU), Germano Santa Brites Dias husu komunidade tomak atu koopera ho Governu, tanba haree katak dezenvolvimentu mai daudaun ona iha komunidade nia leet, realidade hatudu iha fafatin dezenvolvimentu ba setor infraestrutura lao daudaun ona.
Tanba nee husu komunidade koopera nafatin Governu, tanba politika ba dezenvolvimentu nasional ida nee, povu mak sei uza no utiliza fatin sira nee iha futuru.
(EST 1)
