BAUKAU, STLTIMORLESTE.com – Konselhu Suku Fatulia, Postu Administrativu Venilale, Munisipiu Baukau, tinan nee prioridade hadia estrada rural hamutuk kilometru (km) 2 resin.
Xefe Suku Fatulia, Angelo Moises Pererira esplika, tinan 2025 Suku Fatulia hetan alokasaun orsamentu husi PNDS hamutuk rihun US$ 48, kompostu orsamentu operasional no infraestrutura, tanba nee tau prioridade ba estrada rural, husi Aldeia Uaitobono-Sede Suku km 2 resin hodi halo reabilitasaun.
“Tinan nee sei reabilita estrada diresaun husi Aldeia Uaitobono ba sede suku nian hamutuk kilometru 2 ho balun, nee mak prioridade ba Suku Fatulia iha 2025,” hateten Angelo iha Vila Nova Baukau, Sesta (07/02/2025).
Nia argumenta, prosesu reabilitasaun estrada refere tuir planu sei akontese iha fulan Abril tinan nee, maibe depende ba tekniku PNDS, tanba sei presiza tan etapa sira hanesan halo levantamentu dadus, prepara dezenhu, prosesu koutasaun inklui fo kontratu ho pesoal badaen hafoin hakat ba faze implementasaun.
Nia sublina, distansia estrada refere ho kondisaun aat no konsidera grave no tuir planu sei reabilita ho tipu cor hodi evita estragus iha tempu udan, maibe sei hein desizaun husi PNDS, tanba sei halo kalkulasaun ba distansia estrada ho orsamentu.
“Tempu udan movimentu publiku nee bele lao ho diak, laos ba deit ita nian inan aman sira, maibe fasilita mos ita nia alin estudante sira iha Uaitobono lao ba eskola,” Angelo akresenta
Tuir Xefe Suku nee katak, bainhira reabilitasaun estrada refere remata, bele fasilita ona komunidade sira lori produtu lokal ho transporte ba asesu merkadu, inklui fasilita estudante sira husi Aldeia Uaitobono neebe antes nee ho motorizada halai distansia dook hafoin too eskola.
Suku Fatulia iha populasaun hamutuk 2.721, uma kain 688 neebe eziste iha Aldeai Uaitobono, Bahadato, Uatuliana no Ossowake.
(EST 2)
