BAUKAU, STLTIMORLESTE.com – Autoridade Suku Kaibada Makasae, Postu Administrativu Baukau Vila, Munisipiu Baukau, konklui ona submete dadus populasaun ba via online.
Xefe Suku Kaibada Makasae, Julio Alegria Belo esplika, hafoin Suku Kaibada Makasae eziste nuudar Suku foun, Governu liu husi Ministeriu Administrasaun Estatal apoiu ekipamentus hanesan komputador no fasilidade seluk tan ba estrutura Suku Kaibada Makasae, hodi halao servisu ajusta dadus uma kain no populasaun ba via online konsege konklui ona iha fulan liu ba.
“Ami Suku foun maibe husi nasional mai dehan katak maneira oinsa mak diak ita tenke halo ida nee. Suku foun nian ami konsege hatama tiha ona ba online nian agora prosesu lao diak hela, submete husi Aldeia 4 nee tama hotu ona,” Alegria hateten ba STL, iha Kaibada Makasae, Kuarta (26/11/2025).
Nia konsidera, politika Governu apoiu ekipamentus eletroniku hanesan komputador no seluk tan, ba kada Suku apoiu tebes servisu konselhu Suku, maibe mos dizitaliza dadus Suku hodi publiku bele asesu.
Nia sublina, dadus via online hafasil ona servisu Suku nian, tanba bainhira parte Autoridade husi Postu Administrativu too Nasional prezisa dadus populasaun, la prezisa ona pesoal ida lori too Postu no Nasional, maibe envia deit ona liu husi online.
Entretantu dadus neebe Autoridade Suku Kaibada Makasae konklui ona envia ba online populasaun, hamutuk 2.136 husi uma kain 522 eziste iha Aldeia Boru-Baha, Kaiobilale, Data-Ua no Maulame.
Jornalista: Tomas Reis
Editora: Carme Ximenes
