DILI, STLTIMORLESTE.com – Xefe Suku Kolmera, Muises de Araujo Barros hatete, programa neebe bele halibur joven sira mak desportiva, tanba nee Suku Kolmera fo haksolok no halibur joven harii pas no estabilidade ho atividade desportu Futebol.
“Ita haree situasaun neebe sempre provoka publiku baralha mak bainhira joven ho joven asaltu malu, halo konfrontasaun oin-oin, halo situasaun iha Timor Leste (TL) sai imajen aat, tanba ho razaun sira nee, hanesan autoridade lokal iha planu hodi inspira no halibur joven atu hamutuk nafatin, harii pas, liu husi area desportu Futebol nian,” dehan Xefe suku Kolmera, Muises ba STL, iha Sede suku Kolmera, Dili, Segunda(02/12/2024).
Atividade neebe Suku Kolmera implementa tuir nia liu-liu setor desportu sira, hanesan Futebol, Volebol, Basketbool no atividade sira seluk neebe bele inklina aspirasaun joven sira nian, nunee bele halibur joven feto tantu mane atu harii pas no estabilidade iha estadu Timor Leste.
Tanba joven ohin loron nia espiritu dominiu ho problema, husu parte sira neebe mak autoridade lokal sira foti, liu-liu kria atividade hanesan parte desportu nian, oinsa joven sira bele halibur malu ho jogu amizade neebe iha, nee hatudu atu fortifika joven nia pensamentu dook husi konflitu ka problema neebe iha.
Iha parte seluk, Xefe Suku husi Akadiru-hun, Juvinal da Conceição mos realiza atividade desportu, liu-liu Futebol, Volebol, Basketbool no atividade sira seluk, neebe realiza iha suku laran, ho objetivu atu anima no halibur joven sira harii unidade no pas.
Tanba hanesan autoridade nia responsabilidade nee masimu ba komunidade, nunee preokupasaun saida deit, presiza saida deit mak komunidade liu-liu Joven feto no mane sira hakarak, presiza realiza, nunee bele inspira ema hotu atu moria hakmatek.
Entretantu Joven Suku Akadiru-hun, Manuel Ambrozo apresia ba planu autoridade lokal nian, tanba bele realiza atividade deportivu nian iha suku laran, oinsa bele organiza joven sira hodi harii pas no estabilidade iha suku laran.
(EST 1)
