DILI, STLTIMORLESTE.com – Relasiona ho politika Governu halao pagamentu ba ema idade idozus sira, Xefe Suku Kolmera, Moises de Araujo Barros hatete, iha Suku Kolmera idozus nain 60 mak prepara hodi asesu ba pagamentu.
“Hau nia suku, ema idade idozus nain 60 mak daudaun nee prepara hodi simu no asesu ba pagamentu, maibe ita esforsu idozu nain 34 sei simu direta husi suku, no nain 26 simu liu husi bankaria ka Banku Nasional Komersiu Timor Leste (BNCTL – sigla português),” dehan Moises ba STL iha nia knaar fatin Kolmera, Dili, Tersa (04/02/2025).
Nia dehan, pagamentu neebe Governu halo iha kada fulan tolu (3), nee sai hanesan forsa ekonomia ida ba ema idade idozus sira, hodi uza no bele sustenta ba sira nia nesesidade loron-loron, hanesan uza ba sosa hahan hodi han, nunee bele kondisaun saudável nafatin.
Tanba laiha estadu ida mak fo osan hodi ba estraga deit, hanesan uza ba joga, uza ba sosa sasan neebe laiha benefisu, diak liu mak uza hodi sustenta ba oan ka bei oan sira nia estudu, nunee futuru bele sustenta fila fali ba inan aman sira.
Iha sorin seluk, Xefe Aldeia Rai Nain, Teofilho Saldanha Soares afirma, prosesu pagamentu ba idozus sira iha Aldeia 01 Rai Nain durante nee lao hela, no daudaun nee idozus nain 60 mak prepara hodi asesu ba pagamentu. Idozus nain 34 mak sei simu iha loron 6 fulan Fevereiru 2025, no nain 26 durante nee simu ona liu husi sira nia bankaria idak-idak nian.
Entretantu idozus husi Kolmera, Antonio Freitas Fernandes dehan, osan neebe estadu fo ba idozus sira, klaru katak laos uza ba sosa sasan neebe laiha folin, maibe uza ba nesesidade neebe hanesan katuas ka ferik sira bainhira presiza.
(EST 1)
