BAUKAU, STLTIMORLESTE.com – Autoridade Suku Tirilolo, Postu Administrativu Baukau Vila, utiliza orsamentu husi Programa Nasional Dezenvolvimentu Suku (PNDS) tinan nee hamutuk rihun US$ 38 neebe prioridade ba reabilita estrada ba Aldeia Lutumutu no Betulale.
Xefe Suku Tirilolo Elvino Belo hateten, planu Autoridade Suku Tirilolo ba Orsamentu husi PNDS tinan 2025 prioridade ba reabilita estrada iha Aldeia Lutumutu no Betulale, tanba durante nee difikulta movimentasaun transporte publiku no privadu.
“Tinan ida nee ami rebilita estrada ho valor orsamentu rihun US$ 38 husi PNDS, Betulale nian nee husi SMU 01 nian too Riamenau, Lutumutu nian husi Kaimaltada too too kapela Lutumutu nian,” hateten Elvino ba STL iha knaar fatin Sede Suku Tirilolo Baukau Vila, Tersa (05/08/2025)
Nia esplika, orsamentu rihun US$ 38 sei aloka ba material fabrikadu, material lokal no insentivu badaen, neebe Aldeia Betulale nian hahu reabilita husi estrada publiku area eskola sekundaria jeral 01 Tirilolo too area Riamenaun distansia metru 500 no ba Aldeia Lutumutu hahu reabilita husi estrada publiku besik salaun Kaimaltada too kapeta Lutumutu ho distansia metru 170 resin.
Nia sublina, projetu reabilita estrada refere ho tipu cor sementi neebe sei fo asesu ba komunidade uma kain 30 resin iha Aldeia Lutumutu no komunidade uma kain 100 resin bainhira remata servisu.
“Semana kotuk ami halo ona avaliasaun koutasaun horseik ami mobilizasaun trabalhador entaun aban ou bainruak hanesan nee material tun hahu ona servisu ho durasaun servisu fulan tolu,” Elvino akresenta.
Nia informa, projetu reabilita estrada refere ho durasaun fulan tolu no tuir planu sei termina iha fulan Outumbro tinan nee ho kompanhia fornesedor ba material fabrikadu no lokal husi kompanhia lokal Cactus Unipesoal Lda.
Entertantu Suku Tirilolo rasik iha Aldeia neen, mak hanesan Aldeai Lialai-Lesu, Kaisidu, Parlamentu, Ossoua, Lutumutu no Betulale neebe iha tinan 2024 rejistu populasaun mane 5.399 feto 5.204 husi xefe familia 2.020.
(tom)
