DILI, STLTIMORLESTE.com – Daudaun nee kazu pozitivu HIV-SIDA iha Munisípiu Vikeke 23 pesoas, maibe Suku Uma Uain Leten Seidauk rejistu kazu HIV-SIDA iha Sentru Saude Vikeke, tanba nee kontinua halo prevensaun bá moras HIV-SIDA nee rasik.
“Ita iha kazu HIV-SIDA neebe rejistu iha Sentru Saude Vikeke 23 pesoas, maibe iha Uma Uain Leten nia komunidade seidauk pozitivu HIV-SIDA, kazu sei zero,” hatete Ofisial Programa HIV-SIDA iha Munisípiu Vikeke, Joãojinho Viana ba jornalista sira liu husi nia diskursu wanhira partisipa atividade sosializasaun kona-ba HIV-SIDA iha Sede Suku Uma Uain Leten, Postu Administrativu Vikeke, Munisípiu Vikeke, Tersa nee (29/07/2025).
Nia dehan, Uma Uain Leten nia kazu ba HIV-SIDA sei zero, maibe Suku vizinhu sira nee iha, iha balun nain 4, tanba nee husu ba komunidade tenke kuidadu aan no halo nafatin prevensaun bá moras HIV-SIDA.
“Hau espera ba futuru presiza mai konsulta no hasai raan, tanba kazu HIV-SIDA iha Munisípiu Vikeke nain 23, ita boot sira mai hasai raan, ita boot nia moras nee segredu ba ema hotu-hotu, hau mesak mak hatene no ida hasai ita boot sira nia raan nee mak hatene imi nia moras,” nia deklara.
Iha fatin hanesan, Xefe Suku Uma Uain Leten, Martinho S. Gusmão informa, agradese ba INCSIDA tanba too ona mai iha Suku Uma Uain Leten hodi halao sosializasaun ba komunidade sira iha Uma Uain Leten.
“Ita nia komunidade sira bele komprende saida mak HIV-SIDA, tanba moras HIV-SIDA nee moras ida neebe hadaet husi ema ba ema, tanba oinsa maneira autoridade nia prontu atu fahe informasaun nee tutan ba komunidade sira nee ohin la mai partisipa,” nia deklara.
Nunee mos Komunidade Uma Uain Leten, Domingos da Silva koalia, antes INCSIDA seidauk mai halo sensibilizasaun kona-ba HIV-SIDA, sira laiha liu informasaun kona-ba moras HIV-SIDA no oinsa halo prevensaun no tratamentu.
“Ami agradese tebes ba informasaun ida nee, tanba durante nee ami seidauk rona moras HIV-SIDA nee oho ema no HIV-SIDA mak saida no karik kona oinsa halo tratamentu, maibe ohin ita nia nain ulun sira koalia klaru ona no ami komprede ona, depois ami kontente tanba kazu HIV-SIDA nee iha ami nia Suku Uma Uain Leten sei zero, tanba nee ami mos husu nafatin para kontinua halo prevensaun bá moras nee rasik,” nia afirma.
(jen)
