DILI, STLTIMORLESTE.com – Komando Polisia Nasional Timor Leste (PNTL) liu husi Diresaun Servisu Investigasaun Kriminal (DSIK), identifika tan joven mane estudante ida husi Eskola Sekundariu Novel da Paz, deskonfia sunu kareta estadu ida, hafoin envolve iha manifestasaun neebe organiza husi Estudante Universiariu Timor Leste (EUTL) hasoru orgaun soberanu Parlamentu Nasional (PN).
Tuir Portavos Komando PNTL, Superintendente Polisia João dos Reis Belo, iha gravasaun video no voice balun sirkula iha rede sosial WA rame los dehan, autoridade seguransa naok estudante ida ho naran inisial DdC, ida nee lalos, maibe PNTL ezekuta tarefa servisu bolu sidadaun sira neebe mak tuir aparelu CCTV ho drone neebe lansa husi autoridade seguransa grava individu se deit mak halo anarkizmu hafoin envolve iha manifestasaun neebe EUTL hasoru orgaun soberanu PN, ida nee bolu hotu halo identifikasaun.
“Hau atu klarifika katak, sidadaun joven estudante mane ida ho naran inisial Ddc husi Eskola Sekundariu Nobel da Paz, tanba iha relasaun ho aktu krimi neebe nia rasik deklara envolve iha kazu sunu mutuk kareta ida iha area UNTL nia oin, entaun ami ba foti nia halo identifikasaun akompanha direta husi nia advogadu ida,” hatete nia ba jornalista sira iha Komando Jeral PNTL Dili, Sesta (19/09/2025).
Nia esplika, sidadaun estudante nee PNTL ezekuta servisu ba foti iha nia eskola, hafoin mai halo tiha identifikasaun haruka fila ba uma, tanba nee sidadaun sira neebe envolve iha manifestasaun halo anarkismu sunu mutuk kareta ida nee sei foti hotu halo idetifikasaun, tanba nee ekipa autoridade seguransa dadaun nee halo servisu kontinua buka tuir sidadaun sira nee.
Nia hatutan, sidadaun sira neebe envole iha manifestasaun halo anarkismu sunu mutuk kareta no tuda rahun kareta too agora halo ona identifikasaun ba ema nain 13, depois nee haruka fila ba uma hodi hein prosesi. Nunee sei buka tuir tan sira seluk neebe envole iha manifestasaun halo anarkismu.
Iha fatin hanesan, Akademista Jose da Costa Silva informa, manifestasaun durante loron tolu nee rezultadu iha, tanba Parlamentu Nasional kansela, maibe sunu kareta estadu nee PNTL tenke buka tuir no identifika, hodi prosesu ba Ministeriu Publiku, tanba estraga patrimoniu estadu nee krimi.
Jornalista: Jeniche da Costa
Editor: Domingas Gomes
