DILI, STLTIMORLESTE.com – Supermerkadu sira iha Timor Leste (TL) neebe faan produtu importasaun tantu produtu interna neebe falsifika fali data espiradu ba produtu konsumu, signifika nee negosiu neebe ‘mangame’, uniku eskolha tenke fo sansaun ka koima neebe ho rigor.
“Ita haree realidade Supermerkadu SEARA falsifika ba data espiradu ba produtu konsumu sira, liu-liu naan manu kaisa lima, neebe importa husi nasaun Brazil, iha tinan 2021-2022, neebe ho data espiradu ona, maibe falsifika ba data neebe atual tinan 2024 nian, entaun nee supermerkadu neebe mangame tenke fo koima neebe rigor, nunee loron tuir mai labele mangame tan,” hatete akademiku husi Universidade Nasional Timor Lorosa’e (UNTL), area ekonomia no Jestaun, Adolfo Pedro de Andrade nee deklara ba STL, iha kampus Liceu Dili, Kinta nee (24/10/2024).
Produtu neebe espiradu ona, tuir nia kompetensia husi AIFAESA, I.P tenke kontrola, nunee merkadu kiik sira iha rai laran, labele faan sasan neebe data liu ona, tanba bele estraga konsumidor sira nian saude.
Tanba Supermerkadu iha teritoriu nasional barak, entaun tenke funsiona servisu ho diak, oinsa bele kontrola ai-haan sira neebe faan, nunee labele faan sasan neebe espiradu ona.
“Rekomeda ba Governu, presiza atualiza funsionamentu AIFAESA, I.P tenki halo kontrolu ba produtu importasaun sira neebe daudaun nee faan iha merkadu, liu-liu supermerkadu sira, tanba realidade hanesan Supermerkadu SEARA halo, falsifika data espiradu ba produtu sira, entaun nee bele estraga ema nia saude ba vida nian,” dehan nia.
Maibe nia dehan, Supermerkadu sira nee tenke faan ho onestidade, katak sasan neebe espiradu ona labele faan, tenki ba soe iha Tibar, no faan sasan neebe diak ba komunidade atu konsumu.
Tanba aktu neebe Supermerkadu SEARA halo, hanesan falsifika fali data espiradu ba produtu sira, Governu liu husi AIFAESA tenke fo sansaun ida rigor, tenki multa ka koima, tanba hahalok ida nee beibeik ona, nee loja ida neebe atu estraga povu ka konsumidor sira nia vida.
Nunee mos Inspetora AIFAESA, Odete da Silva Viegas hatete, normalmente prosesu husi AIFAESA nian iha diresaun neebe responsabiliza ba servisu inspensaun no fiskalizasaun mak Diresaun Operasional tun iha terenu, hetan foti dosis ohin mensiona, sei hatoo relatoriu ba iha departamentu juridiku, depois juridiku sei halo paraser ba iha inspetor sei haree katak, infrasaun neebe super-merksdu sira halo ka komete nee nia gravidade, oinsa foti sansaun ba kompanhia ka loja neebe komete irregularidade nee.
Nia dehan, se loja hatudu nafatin hahalok hanesan nee, AIFAESA bele taka loja temporaria fulan 1 ou too fulan 3, kuandu sira kumpri fali ona regra neebe AIFAESA no SERVE fo depois bele hahu fali atividade negosiu, ida nee bolu atensaun ba komersiantes hotu-hotu.
Entretantu Manejer SEARA, Engelbertus Babulu rekonhese sira labele nega katak naan manu neebe expire tiha ona nee loos, tanba data iha tinan 2021, 2022, agora husi AIFESA kaer toman ona, sira nia parte rekonhese sala nee ladun diak.
Tanba fo risku ba konsumidores neebe konsumu naan manu neebe rick back rekonhese sala, nunee sansaun saida husi AIFAESA prontu simu.
(EST 1)
