AMBENO, STLTIMORLESTE.com – Suspeitu nain 6 neebe deskonfia pratika jogu online ilegal ba esplorasaun jogu ilisita kriminoza no burla informatika, redi Scam Call Center transnasional, neebe instala husi empreza internasional Seagull Resort husi Malazia iha otel Oe-Upun, hafoin primeiru interrogatoriu loron tomak iha Tribunal Judisiariu Primeira Instansia iha loron Kinta Lokraik (28/08/2025), detein sira iha sela detensaun durante kalan ida iha sela Komando Polisia Nasional Timor Leste (PNTL) Rejiaun Administrativa Espesial Oekusi-Ambeno (RAEOA).
Tuir Advogadu Privadu ba suspeitu nain 6 ba pratika Jogu Online ho Burla Informatika Redi Scam Call Center, Octavio Cardoso dehan, desizaun husi TJPI Distrital Oekusi seidauk iha no konsidera desizaun la bazeia ba kodigu penal Timor Leste nian, tanba molok aprezenta arguidu sira iha tribunal, Ministeriu Publiku ho Polisia Sientifika Investigasaun Kriminal (PSIK) tenke asegura arguidu sira iha sela detensaun durante oras 72.
Laiha buat ida, normalmente iha lapsu balun, neebe atu deklara katak, durante nee suspeitu sira asegura deit iha sira nia rezidensia iha Otel Oeupu, labele hetan liberdade atu sai husi fatin nee, too lori deit mai iha prosesu primeiru interrogatoriu.
“Durante nee sira la mai iha sela detensaun, agora lori ba sela detensaun, mekanizmu seluk neebe mak uza hau la hatene, maibe lo-loos nee, iha inisiu kedas atu aprezenta ema mai iha Tribunal tenke tau iha sela detensaun, ho razaun referida,” lamentavel Advogadu Privadu, Octavio Cardoso, ba jornalista sira iha tribunal Judisiariu Primeira Instansia Distrital Oekusi, Kinta loraraik (28/08/2025).
“Ida nee mak arguidu sira kumpri sela detensaun durante kalan ida deit, tuir lo-loos oras 72 molok aprezenta mai iha tribunal, maibe prontu nee maneira husi Ministeriu Publiku ho PSIK nian, maibe ida nee tuir kodegu prosesu normal neebe mak durante nee lao ka lae ba futuru,” nia esklarese.
Kona-ba prosesu primeiru interrogatoriu, neebe inisiu ohin, hahu iha parte dadersan no kontinua fali iha parte lorokraik, seidauk iha rezultadu final, nunee tribunal deside adia ba aban loron sesta, 29 Agostu 2025 (ohin-Reed) tuku 15:00 loraik.
“Iha prosesu primeiru interrogatoriu ohin nee, ami tenke iha obrigasaun atu asegura segredu justisa, hau seidauk hateten katak, arguidu sira neebe aprezenta mai nee, sai hanesan maksalak, maibe iha indisu, nia iha direitu prezunsaun inosente neebe mak lei asegura. Tanba nee, koalia kona ba rezultadu ba iha medida koasaun iha andamentu neebe mak lao ohin, ita so bele hatene depois de aban despaisu husi Tribunal nian, neebe ohin seidauk iha desizaun ka despaxu medida koasaun,” haktuir Octavio Cardoso.
Audiensia Primeira Interogatoriu nee, lidera husi husi Juis Administrador Judisiariu Primeira Instansia Oecusse, Evangelino Belo, Ministeriu Publiku reprezenta husi Prokurador Mateus Nessi ho Jose Elo no suspeitu nain 6 nee serbisu iha kompanhia Seagull Resort husi Malazia neebe halao atividade jogu Online no Redi Scam Call Center Transnasional neebe instala iha Otel Oeupu RAEOA, hetan asistensia legal husi defeza Advogadu Privadu Octavio Cardoso ho Jhon Ndun, nunee Defensor Publiku Estaqui Guterres.
Jornalista: Joseph Koa
Editor: Joseph Koa
