BAUKAU, STLTIMORLESTE.com – Profesora Suzana Baptista Freitas husu Diretor Servisu Munisipal Edukasaun Baukau atu komprende nota kolokasaun, tanba nota kolokasaun neebe Servisu Edukasaun Baukau hasai, hodi muda nia kokokasaun husi eskola Ensinu Baziku Filial Uaiburu, Postu Administrativu Baguia, Munisipiu Baukau ba fali eskola Ensinu Baziku Filial Buasare, Postu Baukau Vila laos provizoriu, maibe permanente.
“Iha nota kolokasaun laran la relata provizoriu, maibe iha nota kolokasaun katak muda ba Buasare, tanba ho kondisoens neebe mak relata tomak iha karta pedidu nota kolokasaun sira fo. Sim hakerek mos hela iha laran laos provizoriu, laos hau mak komprende sala maibe espera nain hira neebe halo karta komprende nia karta ida nee,” hateten Suzana Baptista Freitas ba STL iha Vila Antiga, Baukau, Sesta (22/08/2025)
Profesora Suzana Baptista Freitas haktuir, prosesu muda kokokasaun husi Eskola Ensinu Baziku Filial Uaiburu Postu Administrativu Baguia ba fali Eskola Ensinu Baziku Filial Buasare Postu Baukau Vila, tanba kondisaun saude la permite, nunee razaun muda kolokasaun husi Uaiburu Postu Baguai ba iha Buasare Postu Baukau Vila, objetivu besik liu fasilidade saude atu nunee bainhira moras atake derepente bele lalais ba fasilidade saude, tanba iha Uaiburu ba fasilidade saude distansia dook.
Ho razaun nee mak iha loron 21 Maiu 2024 Suzana hasoru direita Diretor Servisu Munisipal Edukasaun Baukau aprezenta kondisaun saude neebe enfrenta no Servisu Munisipal Edukasaun Baukau foti inisiativa konfirma direita ba Nasional liu husi telefone, parte Nasional fo kompetensia tomak ba Servisu Edukasaun Baukau haree asuntu refere.
Remata kontaktu ho Nasional, Servisu Edukasaun Baukau orientas kedas profesora Suzana Baptista Freitas halo karta pedidu aneksa ho esplikasaun moras neebe enfrenta hafoin Servisu Edukasaun Baukau hatun nota kolokasaun ho numeru 531/SME-Bcu/VI/2024 katak, bazeia ba karta pedidu husi bolsa kandidatu, ho asuntu muda kolokasaun ba profesora kolokasaun atual iha EBF 1,2 Siklu Uaiburu, Postu Baguai, Munisipiu Baukau ho razaun gravida no moras seluk tan. Nunee Diretor Servisu Munisipal Edukasaun Baukau fo nota kolokasaun ba profesora Suzana halao nia knaar muda manorin iha eskola EBF Buasare, Postu Baukau Vila.
Maibe Diretor Servisu Munisipal Edukasaun Baukau hatan ba preokupasaun sira la tuir karta pedidu neebe iha no la tuir nota kolokasaun neebe iha.
“Hau sente deskontente ho ida nee, tanba informasaun neebe espalha la kondis ho karta pedidu no sira nia karta neebe fo ba hau, entaun horiseik hau hasoru direita kedas diretor iha fatin hodi konfirma no hatoo karta hirak neebe fo sai, nee mak haruka hau atu halo tan karta, hau hatan labele tan halo karta pedidu dala ida, tanba ida nee aseitasaun karta sai tiha ona, espera katak lee ona nota kolokasaun tun ba hau,” Suzana espresa.
Profesora nee katak, hafoin hetan informasaun liu husi publikasaun notisia kona-ba nia kolokasaun, nia parte prezensa kedas iha edifisiu Servisu Munisipal Edukasaun Baukau halo konfirmasaun kona-ba nota kolokasaun, parte Servisu Edukasaun Baukau orienta atu relata tan karta pedidu ida, maibe la ho resposta klaru.
Tanba nee husu Servisu Edukasaun Baukau molok hatun nota kolokasaun presiza lee uluk lai hafoin hatun nota kolokasaun, laos seluk ezije iha publiku hafoin hatan ho deklarasaun la bazeia ba karta pedidu no nota kolokasaun neebe iha.
Nia konta, daudaun hanorin iha Eskola Ensinu Baziku Filial Buasare responde hela ba multi klase, tanba profesor la sufisiente hodi responde ba estudante sira husi klase primeiru too sestu.
(tom)
