DILI, STLTIMORLESTE.com – Ministeriu Publiku (MP) iha alegasaun ba krime Arma Branka, solisita ba iha Tribunal Koletivu atu kondena arguidu nain rua ho inisial JB no JdS prizaun tinan 3, tanba komete krime hasoru lezadu inisial AdSC.
Iha sala julgamentu laran, Prokuradora prosesu deklara katak, arguidu sira nia hahalok prienxe ba elementu krime neebe iha. No kauza husi arguidu sira nia hahalok mak lezadu sofre nia liman fuan rua la iha.
Tanba nee MP la iha duvidas, mantein ho akuzasaun neebe iha, solisita ba iha Tribunal Koletivu atu kondena arguidu nain rua ho pena prizaun tinan 3 efetivu.
Enkuantu husi parte defeza nian husu Tribunal tetu deklarasaun sira hotu atu bele aplika justisa neebe justu ba arguidu nain rua.
Rona tiha alegasaun, Tribunal adia ba loron seluk hodi tama iha faze desizaun.
Iha indisiu katak, iha loron 28/3/2020, lezadu ho nia kolega TG iha hela uma laran, derepente deit arguidu sira ba hamriik iha lezadu nia baraka okos hodi hakilar dehan agora ita baku rahun no sunu tiha uma nee, tanba nee mak lezadu sai husi uma ba arguidu JB dehan tanba saida mak imi mai hakarak baku rahun no sunu tiha uma nee, uma nee sala saida, maibe arguidu sira kontinua hateten katak baku rahun sunu tiha uma nee.
Lezadu fo hatene ba arguidu sira katak, se lanu karik kalan ona ba toba deit. Maibe arguidu JB tuku kedas lezadu la kona. Tuir fali testemunha TG mos fo hatene ba arguidu sira dehan se lanu karik ba toba tiha deit, maibe arguidu JB tuku fali testemunha kona iha ninia knosen sorin karuk.
Mezmu nune, testemunha kontinua fo hatene ba arguidu sira katak se lanu ba toba tiha, maibe arguidu sira ataka lisuk testemunha hodi halo agresaun fizika, tuku no tebe halo testemunha monu tun ba rai, foin lezadu atu ba salva, maibe la konsege tanba arguidu JdS kaer hela katana maubeka ida no arguidu JB ho suspeitu M kaer hotu tudik.
Nune lezadu mos halai tiha, mezmu nunee arguidu JdS duni tuir hodi sona dirije ba iha lezadu ninia hirus matan, maibe tanba lezadu baku sees tiha tudik nee, tudik kona fali iha liman fuan rua sorin karuk nian kotu tabele kedas.
Ho kondisaun ida nee mak lezadu hakilar bolu ninia tiu, foin arguidu sira halai husi fatin neeba.
Konsekuensia husi arguidu JdS ho JB ninia konduta deskrita halo lezadu hetan kanek iha liman fuan rua hodi lori ba suku iha HNGV too suku pontus hitu (7), no kontinua baixa durante loron ida kalan ida.
Arguidu JdS ho JB pratika faktu sira nee ho forma neebe livre, deliberada no konsientemente, lori tudik sona halo lezadu AdS hetan kanek iha liman fuan rua.
Arguidu sira tau esforsu hamutuk hodi halo agresaun ba lezadu ho nia kolega TG hodi hamosu kanek, moras no bubu iha zona atijidu.
Arguidu sira hotu hatene katak, lori ka kaer sasan kroat hodi halo ema seluk kanek, tuir lei bandu tiha ona, nuudar krime arma branka, nunee hahalok hetan kastigu penal.
Ho nunee, arguidu sira hanesan autor material ho forma konsumadu, hodi pratika konkursu krime armas brankas no ofensa ba integridade fizika simples neebe previstu no punidu tuir artigu 145 numeru 1 Kodigu Penal, no lei numeru 5/2017, 14 Abril.
Audensia Julgamentu nee prezide husi Juiz koletivu, Zulmira Auxiliadora, Argentino Nunes no Ivan Patrocenio, Ministeriu Publiku reprezenta husi Prokuradora Remizia de Fatima da silva, no arguidu sira hetan asistensia legal husi Defensor Publiku Manuel Sarmento.
(ter)
