DILI, STLTIMORLESTE.com – Tribunal Judisial Primeira Instansia Dili (TJPID) liu husi despaisu ikus ba prosesu primeiru interogatoriu, deside aplika medida Prizaun Preventiva ba arguidu nain ida no aprezentasaun Periodika ba arguidu nain rua.
Arguidu sira submete mai iha Tribunal, tanba hamate vitima Fernando Madeira kodigu Nando Udan Ben, iha area Erbuti, Suku Goulolo, Postu Administrativu Lete Foho, Munisipiu Ermera.
Arguidu nain tolu ho inisial MD, JD no AS, Ministeriu Publiku (MP) promove ho krime Omisidiu Argavada tuir artigu 139 husi kodigu penal Timor Leste no krime Arma Branka turi artigo 2ยบ n. 2 alinea a) no mos artigo 200 n.1 husi Lei N.5/2017, Lei konaba Rejime Juridiku Relativu Pratika Arte Marsiais, Rituais, Arma Brankas, Rama Ambon Kinta Alterasaun Kodigu Penal.
Juiza Turnu Ana Paula Fonseca halo tiha indentifikasaun ba arguidu nain tolu, ikus mai deside tama ba iha alegasaun.
Iha alegasaun husi parte MP neebe reprezenta husi Prokurador Ricardo Leite, husu Tribunal atu aplika medida Prizaun Preventiva (PP) ba arguidu nain tolu.
Enkuantu parte defeza nian husu Tribunal atu aplika medida Aprezentasaun Periodika ba arguidu nain tolu.
Rona tiha alegasaun, ikus mai Juiza Turnu Ana Paula Fonseca, hatun despaisu hodi deside aplika medida Prizaun Preventiva (PP) ba arguidu ho inisial JD, tanba konsidera iha indisus forte.
Ba arguidu nain rua ho inisial MD no AS, Tribunal liu husi despaisu ikus deside aplika medida Aprezentasaun Periodika, atu aprezenta an iha Eskuadra Polisia neebe hela besik ba fulan ida dala ida.
Prosesu nee prezide husi Juiz turnu Ana Paula Fonseca, Ministeriu Publiku reprezenta husi Prokurador Ricardo Leite, arguidu sira hetan asistensia legal husi Defensor Publiku estajiadu Mateus Pinto.
Tuir kronolojia katak, kazu nee akontese iha loron 06 fulan Marsu tinan 2025. No problema nia hun mosu diskusaun tanba rai, vitima baku uluk arguidu JD, tanba nee mak arguidu JD ba foti katana iha dapur hodi taa dala tolu iha Vitima nia ulun, taa dala barak iha vitima nia kakorok hodi rezulta vitima Fernando Madeira mate fatin.
Vitima hanesan mane foun, arguidu nain tolu nee ida hanesan vitima nia banin mane no nain rua seluk hanesan vitima nia tiun, tanba vitima hola sira nia feton.
(ter)
