DILI, STLTIMORLESTE.com – Ministeriu Publiku (MP) iha alegasaun ba krime Danu Agravadu, solisita ba iha Tribunal atu aplika ba arguidu nain rua ho inisial AdCS no EP, indemniza hikas lezada JM nia sasan neebe estragus.
Iha alegasaun Ministeriu Publiku reprezenta husi Prokurador Domingos Bareto husu Tribunal fo advertensia ba arguidu nain rua, atu iha futuru labele halo tan. No MP mos husu Tribunal atu deside arguidu nain rua selu fali sasan sira neebe halo estragus ona, tuir saida mak lezada aprezenta ona.
No parte Defeza deklara katak, krime neebe Ministriu Publiku imputa ba arguidu sira la tama iha Danu Agravadu, tanba nee husu Tribunal atu halo alterasaun Kualifikasaun Juridiku ba Danu Simples.
No kona-ba krime Arma Branka defeza intende, la priense tanba arguidu uza katana nee laos ho intensaum atu oho ema maibe ameasa deit, tanba nee defeza husu Tribunal tetu deklarasaun sira hotu no aplika pena neebe justisa ba arguidu sira.
Hafoin rona tiha alegasaun, Tribunal deside muda ba loron seluk hodi rona desizaun ikus.
Iha indisius sufisiente katak, iha loron 16 fulan Janeiru tinan 2022, por volta 20h:45, lezada JM ho familia sira konta istoria iha nia uma.
Bainhira sira tuur konta istoria, arguidu EP sikat tudik ida 50 cm iha kalsa kotuk hodi tolok no trata lezada ho nia familia sira.
Iha altura neeba lezada nia maun la simu arguidu nia insulta no tolok, tanba nee nia mos simu hasoru sira hodi diskuti malu.
Lezada hateten ba iha arguidu hodi dehan o nee beibeik ona, o hemu tua lanu o sempre mai halo provokasaun no trata ami.
Arguidu hakbesik ba iha lezada hodi liman tuku kona iha lezada nia ibun no tilun hun hetan kanek raan sai, tanba nee lezada nia kuinada foti ai pedasuk ida hodi baku ba arguidu nia tilun hun hetan kanek.
Iha altura neeba arguidu hakilar, tanba nee arguidu AdCS rona hodi mai taa kadeira masa lima no taa ai-riin uma nia hetan kabetok.
Konsekuensia husi asaun nee halo lezada hetan moras iha fatin atinjidu no nia kadeira masa lima hetan estragus no besi riin ida.
Arguidu sira hatene katak, bainhira lori liman tuku ema bele halo ema moras no kanek no mos lori baliu taa ema nia sasan bele hetan estragus, maibe sira halo nafatin.
Arguidu sira halo krime ho livre, deliberada konsientemente no hatene katak hahalok nee lei bandu no kastigu tuir lei.
Arguidu sira hanesan ko-autor material ba konkursu krime danu ho violensia previstu tuir artigu 260 husi kodigu penal no krime Armas Brankas lei numeru 5/2017.
Lezada JM hetan prejuizu husi arguidu sira nia hahalok hanesan lori kroat taa estragus nia kadeira ho montante US$ 40.00 nomos besi rin ida ho valor US$ 17,50 sentavus.
Haree ba faktus sira iha leten, Ministeriu Publiku tuir artigu 72, 349 no artigu 417 husu ba iha Tribunal atu kondena arguidu nain rua selu indemnizasaun ho valor US$ 57.50 ba lezada.
Audensia Julgamentu nee prezide husi Juiz koletiva Julmira Auxiliadora, Ivan Patrocenio no Juiz estajiariu nain ida, Ministeriu Publiku reprezenta husi Prokurador Domingos Bareto, no arguidu hetan asistensia legal husi Defensor Publiku nain ida.
(ter)
