DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu nain 3 ho inisial MSB, JB no CC, tanba halo agresaun hasoru lezadu ho inisial SSF.
Tuir akuzasaun neebe Juiz Prosesu Jose Maria lee sai katak, iha loron 26 fulan Julhu tinan 2021 iha area Laurehou, Lisapat, lezadu fila ba uma iha oras 00h00, too iha dalan haree arguidu MSB hein hela lezadu ho katana ida iha liman.
Bainhira lezadu lao besik ba iha arguidu, imediatamente arguidu taa kedas lezadu nia ain parte los dala ida lezadu monu kedas ba rai hodi hakilar.
Arguidu MSB nega katak, laos mak uza katana hodi taa lezadu maibe arguidu JB mak taa lezadu.
Lezadu hasee arguidu katak “hai nusa o taa fali hau?, arguidu dehan tan o hadeer ka book aan hau taa mate kedas o, maibe parte seluk arguidu MSB nega katak laos arguidu MSB mak taa lezadu, maibe arguidu JB mak taa lezadu.
La kleur lezadu nia maun VM too arguidu sira husik tiha motor hodi halai liu. No VM dudu arguidu sira nia motor ba uma ho hirus, VM lori ai baku rahun motor nia bodi.
Konsekuensia husi arguidu sira nia konduta lori katana taa lezadu nia ain tuban parte los dala ida kauza tao agora lezadu la bele lao hanesan baibain no presiza ema seluk nia apoiu.
Arguidu sira pratika sira nia hahalok ho forma livre, deliberada, ho konsiensia rasik hodi tau forsa hamutuk ho meius ba hein lezadu iha dalan ho kedas katana iha liman, hodi taa lezadu nia ain atu hamosu rezultadu ba lezadu nia isin lolon, hatene hela katak hahalok ida nee lei proibe no sei hetan kastigu, maibe arguidu sira hakarak halo nafatin tuir saida mak deskreve ona iha leten.
Konstitui arguidu sira nuudar ko-autor material ho forma konsumuada ba pratika konkursu real ba krimi rua ofensas ba integridade fizika grave tuir artigu 146 konjugadu ho artigu 30° husi Kodigu Penal no pose ba armas brankas tuir artigu 2 no artigu 20° husi Lei n.5/2017.
Hatan ba akuzasaun neebe iha, arguidu MSB deklara katak, arguidu mak lori katana taa lezadu nia ain parte los hodi monu ba rai, kona-ba arguidu nain rua seluk la lori katana hodi taa lezadu nia ain.
Arguidu deklara, momentu neeba arguidu nain 3 hamutuk hela iha area akontesimentu nee iha oras 12, halo adat uma lisan, no arguidu rekonhese momentu neeba arguidu kaer katana iha liman.
Arguidu deklara, taa lezadu tanba antes nee sira iha problema hela halai ba iha arte marsiais nian, no arguidu hanesan membru PSHT arguidu nain rua seluk KORKA, no lezadu rasik mos KORKA. Arguidu taa lezadu tanba kondisaun lanu la kontrola aan, tanba nee mak arguidu taa lezadu.
Arguidu rekonhese lori katana taa dala ida iha lezadu nia ain no kona iha ain parte loos hodi halo lezadu monu ba rai. Kona-ba arguidu nain rua seluk sira nain rua la halo buat ida.
Arguidu mos konhese VM hanesan lezadu nia maun neebe dudu arguidu nia motor, no ikus mai hirus hodi sunu tiha motor refere.
Arguidu deklara, sira problema liu tiha semana ida mak arguidu hodi katana taa lezadu nee. Maibe agora sira rezolve no diak malu ona.
Arguidu CC deklara katak, momentu neeba arguidu mos partisipa iha halo uma lisan nee, inklui lezadu no VM. Arguidu rekonhese, antes nee sira iha ona problema entre arte marsias KORKA no PSHT. No arguidu deklara, laos arguidu mak taa lezadu, maibe kona-ba motor arguidu MSB nian VM mak baku rahun no agora sira diak malu ona.
Aleinde nee aguidu JB deklara katak, arguidu MSB mak taa lezadu no arguidu rekonhese nia mai husi organizasaun KORKA.
Iha sala julgamentu laran lezadu deklara katak, momentu neeba sira halo uma lisan, lezadu mos hemu tua hotu. Maibe lezadu haree ho matan, arguidu MSB mak taa lezadu. Maibe sira rezolve ona no arguidu MSB fo ona osan ba lezadu.
Rona tiha arguidu no lezadu, iha alegasaun Prokurador Ozorio de Deus husu Tribunal atu aplika pena prizaun tinan 3 suspende tinan 3 ba arguidu ho inisial MSB. Kona-ba arguidu nain rua selu JB no CC husu Tribunal tetu aplika desizaun tuir konviksaun Tribunal nian.
Enkuantu husi defeza Marsal Macarinhas husu Tribunal tetu hodi aplika desizaun neebe justu ba arguidu sira.
Rona tiha alegasaun, Tribunal adia ba loron seluk hodi rona desizaun.
Prosesu nee Prezide husi Juiz Koletivu, Jose Maria, Ersilia de Jesus, Ana Paula, Ministeriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku, Marsal Mascarinhas.
(ter)
