DILI, STLTIMORLESTE.com – Administrador Postu Administrativu Alas, Munisipiu Manufahi, asina ona termu entrega materia sensitivu no non sensitivu ba Eleisaun Lideransa Lokal ba Suku Tahubein, neebe sei realiza aban.
Informa II Visi Sekretariu Ekipa Susesu Hamoris Fali Suku Tahubein, Alarico Martins katak, materia sensitivu no non sensitivu ba Eleisaun Suku Tahubein too ona iha fatin, tanba nee eleisaun sei halao iha loron Sabadu (25/01/2025).
“Ohin 24 /01/2025, oras 09.55, Administrador Postu Administrativu Alas asina ona termu entrega material sensitivu no laos sensitivu iha STAE Munisípiu Manufahi no hahu dezloka ba Sentru Votasaun EBF 123 Wedauberek too iha fatin tuku 12:02”, informa II Visi Sekretariu Ekipa Susesu Hamoris Fali Suku Tahubein, Alarico Martins ba STL via telefone iha Alas Wedauberek, Munisipiu Manufahi.
Nia informa, iha dezlokasaun materia sensitivu no non sensitivu nee akompanha husi STAE Nasional no Munisipiu Manufahi, CNE Munisípiu Manufahi, Administrador Postu Administrativu Alas, Pesoal Servisu Apoia Suku (PSAS) no Pesoal Servisu Apoia Aldeia (PSAA), no hetan apoia husi Polísia Munisipiu Manufahi no Posto Alas.
Enkuantu ekipa neebe hein mak hanesan Xefe Suku Mahaquidan, Kandidatura Xefe Suku Tahubein, Meza Eleitoral Aldeia, ekipa apoia harii fali Suku Tahubein no Komudidade Tahubein.
Tuir informasaun neebe STL asesu, komunidade Tahubein entuziasmu loos hodi halao limpeza iha sentru votasaun prepara ba eleisaun.
(gui)
