DILI, STLTIMORLESTE.com – Kompanhia sira iha Kapitál Dili neebe halao konstrusaun estrada hodi taka dalan iha area Bairo Pite no hamosu engarrafamentu nee laiha informasaun ba Diresaun Tranzitu Seguransa Rodaviariu Nasional (DTSRN).
Nia dehan, situasan taka dala derrepente ida nee mak problema, tanba dala barak hau koalia, dala ruma kompanhia sira iha Dili laran hakarak taka dalan tenke koordenasaun ho Polisia Tranzitu atu nunee oinsa fo sinais balun, tanba derrepente situasaun sira akontese.
“Mais ita tenta para fo nafatin informasaun ba iha kompanhia sira antes taka dalan informa ona Polisia Tranzitu, mínimu ba OPS sira, informa ba sira para sira bele fo informasaun too mai iha leten,” hatete Diretor Diresaun Tranzitu Seguransa Rodoviária Nasional (DTSRN), Superintendente Assistente Polísia, Luis da Costa ba jornalista sira iha Largo Lesidere Dili, Kinta (15/05/2025).
Nia esplika, situasaun nee prejudika ba ema seluk nia movimentasaun, tanba nee avizu nafatin ba Kompanhia sira wainhira taka dalan informa hela ba Polisia Nasional Timor Leste (PNTL).
“Ita nia dalan mak nee ona, laiha dalan alternativu seluk, ita nia koordenasaun mak importante, tanba ita DTSRN laiha informasaun, derrepente konstrusaun nee mosu, dalan nee taka, ida nee prejudika tebes ba ita nia engarrafamentu, ita nia movimentasaun transporte sira neebe sirkula iha kapital Dili nee,” nia informa.
Iha fatin ketak, Kondutor Mikorlet 06, Sabino da Costa deklara, kompanhia neebe halao konstrusaun estrada iha kapital Dili sempre taka dalan iha fatin-fatin, maibe laiha prezensa Polísia Tranzitu hodi kontrola transporte sira nia movimentu.
“Ita haree Polisia Tranzitu nian prezensa iha dalan taka, tanba iha Diresaun Hudi Laran dalan tesik mai sorin taka, depois hamosu engarrafamentu, no Polisia Tranzitu la orienta transporte sira, karik sira laiha informasaun ga oinsa, tanba loron hira ona dalan taka hamosu engarrafamentu,” nia afirma.
(jen)
