DILI, STLTIMORLESTE.com – Bainhira Timor Leste tama iha Association of Southeast Asian Nations (ASEAN), Ministeriu Ensinu Superior Siensia no Kultura (MESSK) husu instituisaun ensinu superior sira tenke nakloke, para bele simu parseiru internasional.
Haktuir Ministru Ensinu Superior Siensia no Kultura (MESSK), Jose Honorio da Costa Pereira Jeronimo ba jornalista sira iha City 8 Manleuana, Kinta (04/09/2025).
Nia dehan, ensinu superior tenke prepara aan para tama ba rede ASEAN.
“Ita tenke prepara aan para ita tama ba rede ASEAN no ita konvida ona sira mai ho halo semináriu internasional ida iha Delta Nova. Ita tenke tama rede para oinsá bele ajuda ita ensinu superior sira iha Timor-Lestr para simu parseiru internasionál,” nia afirma.
José hatutan, MESSK sempre fó apoiu ba ba ensinu superior sira, tanba papél importante governu nian kontinua fasilita subvensaun hodi sira bele mellora liutan sira-nia formasaun ba estudante hodi hasae iha IES Timor Leste.
“Ida nee importante tanba bainhira atu adere ba ASEAN tenke iha rekursu umanu neebe kualidade, entaun presiza oferese formasaun no MESSK apoiu tebes ba ideia ida nee. Tanba nee fururu ami promove profesor iha Timor Leste, tanba edukasaun baze ba ita nia jerasaun foun sira importante,” nia dehan.
Formasaun nee halo parte ba prioridade MESSK nian neebe hodi atribui subvensaun publika ba ensinu superior. Tanba liuhusi nee mak bele eleva kualidade edukasaun.
Entretantu Reitor Institute Ciensia Saude (ICS), Leao Borges hatete, bainhira TL tama ona ba ASEAN nee, sira mos livre iha parte ekonomia ninia. Husi parte akademia nian haree katak, tenke prepara aan halo didiak, maibe tempu nee agora badak ona, tanba tuir planu governu nian iha fulan Outubru, formalmente sai membru ASEAN, nee tenke simu realidade neebe mak iha, no tenke preparadu simu realidade ba aban bain rua ninia.
“Bainhira atu adere ba iha ASEAN nee parte ida husi planu governu nian, nee maka ita TL nee agradese, tanba ita atu tama ba iha ASEAN nee,karik la lori tempu naruk, nee parte pozetivu. Agora nasaun balun dehan lori tempu naruk tama ba ASEAN, maibe ita la lori tempu naruk, ida nee parte pozitivu ida. Ida fali diak, maibe ita mos tenke prepara ita nian rekursu umanu,” dehan nia.
Jornalista: Jacinta Sequeira
Editora: Domingas Gomes
