DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial TCD nuudar laen, tanba komete krimi hasoru lezada ho inisial E hanesan feen.
Tuir akuzasaun neebe Juiz Prosesu Jose Gonsalves lee sai iha loron Sesta, (24/01/2025) katak, iha loron 12 Novembru tinan nee, oras tuku 13:50 OTL, arguidu halo agresaun fizika hasoru lezada iha sira nia uma Suku Mascarenhas, Dili.
Motivu husi problema, tanba momentu neeba lezada nia telefone arguidu mak kaer hela, la kleur mensajen ida tama ba lezada nia telefone, hafoin arguidu husu ba lezada katak, se mak mensajen tama mai iha o nia telefone nee, lezada hatan katak hau la hatene ida.
Wainhira rona tiha lezada koalia, arguidu hirus lori liman basa kedas lezada nia hasan karuk ho los hodi rezulta lezada monu ba kulsaun leten, mak arguidu sae ba lezada nia leten hodi tuku tan dala ida kona iha lezada nia ulun parte kotuk.
Konsekuensia husi hahalok arguidu nian, rezulta lezada sente moras no bubu iha ulun ho hasan karuk ho los, lezada la ba halo tratamentu iha sentru saude.
Arguidu halo ho forma livre, ho depropozitu halo agresaun fizika hasoru lezada E, nuudar arguidu nia kaben, katak lori liman halo agresaun fizika hasoru lezada, konsidera hanesan meiu ida hodi halo moras no bubu ba lezada nia isin, tuir buat neebe mak hakerek ona iha leten.
Ho hahalok sira nee, konsidera arguidu hanesan autor material ho forma konsumadu, pratika krimi ida, Violensia Domestika lei numeru 7/2010, ho forma ofensas integridade fizika simples, tuir artigu 145 husi Kodigu Penal.
Hatan ba akuzasaun neebe iha, arguidu konfesa imparsial ba faktus katak, arguidu halo duni agresaun hasoru lezada, tanba haree mensajen tama iha lezada nia telefone.
Arguidu deklara, hahu husi neeba mai too agora la iha problema ona, Arguidu mos arepende tebes arguidu nia hahalok nee.
Iha sala julgamentu laran, lezada mos haforsa akuzasaun neebe iha katak, arguidu halo duni agresaun, maibe lezada ba keixa tiha, hahu husi loron akontesimentu too mai agora la iha tan problema.
Rona tiha lezada no arguidu, iha faze alegasaun Prokuradora Ivonia Guterres mantein ho akuzasaun neebe iha, husu Tribunal atu kondena arguidu pena prizaun fulan 6, suspende ba tinan 2.
Enkuantu defeza Juvinal Dias husu Tribunal tetu sirkunstansia sira no husu atu aplika pena multa ba arguidu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Jose Gonslaves, Ministeriu Publiku reprezenta husi Prokurador Matias Soares, arguidu hetan asistensia legal husi Defensor Publiku Juvinal Dias.
(ter)
