Tanba Deit la Suru Etu ba Mestri, Koordenador Eskola Waimanuboe Duun Kozineira Lori Etu

BAUCAU, STLTIMORLESTE.com – Kozineira iha Eskola Ensinu Baziku Filial Katolika Waimanuboe lamenta ho deklarasaun husi Koordenador Eskola, Andre Bras Belo, tanba Koordenador Eskola duun kozineira lori etu ba uma no manu tolun ida fahe ba estudante nain rua, maibe kozineira klarifika katak, durante nee koordenador mak ezije liu hahan, tanba deit la suru ba nia, ikus dun Kozineira lori hahan restu duke halo koordenasaun neebe diak iha eskola referida.

Kestaun nee hatoo husi Kozineira Maria Sabina ba jornalista STL iha Wailili, Sabadu nee (23/08/2025).

Nia esplika, deklarasaun neebe hatoo husi koordenador eskola ba Media STL nee nakonu ho odiu no vingansa, tanba durante nee Koordenador mak ezije hakarak mestri sira han hotu, maibe ikus ikus nee EJP ho Kozineira fo hahan ba manorin sira iha eskola ikus defama fali Kozineira.

Kozineira nee konta katak, durante eskola feriadu koordenador foti alunus nia osan iha eskola total US$ 92.04, la hatene atu halo saida, no tempu han sira mos husu hakarak han hotu, sira la mai direta, maibe haruka estudante sira mai husu suru lori ba eskola laran mak mestri sira han, maibe parte edukasaun husi Baukau mai esplika katak, labele suru ba mestri sira, entaun parte tein ho EJP deside la suru, ikus koordenador defema kozineira, tanba nee nia parte la sastifas.

“Relasiona ho notisia STL nebe hatun iha dia 22 Agostu 2025, Koordenador Eskola dehan katak kozineira lori fila etu ba uma ka etu foer ba uma, hau kozinera la stisfas informasaun husi Koordenador Eskola Waimanuboe nee, tanba prosedur merenda eskolar nia bainhira alunus han hotu ona hau kozinera fila uma ona, a nao ser alunos la han sira bele lamenta, tanba koordenador nia hakarak mestri hetan hotu merenda, ami ho EJP la fo ba sira entaun kesar dehan kozinera lori fila etu ba uma, hau la simu ingnorasaun sira nee, koordenador nee mos foti merenda eskolar nia osan durante alunus feriadu nee ho total hamutuk US$ 92.04, foti iha 30 Maiu 2023, foti osan nee iha testamunha mestri ida nia oin ate a data koordendor sedauk fo fila, la hatene osan nee mestri ka koordenador halo saida,” katak Kozineira.

Nia mos lamenta ho deklarasau husi koordenador neebe deklara katak manu tolu ida fahe ba rua hodi fo ba estudante, ida nee informasaun neebe lalos no defama ho liafuan neebe bosok nakonu ho odi vingansa.

“Hau nuudar kozineira lamenta ho informasaun neebe Koordenador Eskola katak, estudante sira han deit oituan no modo natoon no hahan hau lori fali ba uma, informasaun neebe lalos no la tuir realidade neebe iha, hau lori etu restu bainhira etu mutuk iha hau lori, no hau fila uma bainhira estudante sira han hotu ona, mestri ezije etu atu han maibe ami la fo, hakarak lori etu mutuk fohan nia animal karik koalia deit laos bobar fali lia bosok,” katak nia.

Nia hatete, bazeia ba servisu neebe loron-loron nia enfrenta mak etu motuk nia la nega, nia lori hodi fo han animal maibe laos etu diak sira.

“Etu mutuk hau lori fila duni atu fo han balada sira inklui etu restu neebe labarik sira han, maibe hau haree alunus sira nee han hotu mak hau foin lori fila tanba hau mos lakohi atu fakar etu foer arbiru iha areador eskola. Buat neebe durante nee hau enfrenta mak justru mestri mak ezije loos atu han iha eskola, maibe antes nee EJP mai esplika klaru tiha katak mestri sira laiha direitu ba hahan, entaun ho ida nee mak koordenador laran moras hodi duun katak estudante sira han deit etu oituan, no etu barak mak hau lori fali ba uma, hau lamenta loos ho koordenador nia deklarasaun nee,” Hakotu nia.

Iha loron Sesta (22/08) Koordenador EBF Katolika Uaimanuboe, Andre Bras Belo ba STL hatete, observasaun eskola nian ba implementasaun merenda eskolar iha EBF Katolika Uaimanuboe durante nee dala ruma la tuir menu neebe iha, tanba tempu estudante han ho modo manu tolun laos manu tolun fuan tomak, maibe fuan ida fera ba rua hodi fahe ba estudante nain rua. No tuir mata dalan etu ho manu tolun akompanha mos ho aifuan sira hanesan hudi tasak no seluk tan, maibe nee la akontese, tanba estudante han etu ho manu tolun rohan ho moelhu neebe limitadu, konsidera estudante sira han maran deit liu-liu iha loron Tersa no Sesta, enkuantu loron seluk diak tanba han ho modo been.

Koordenador nee sublina, etu restu neebe kozinha lori ba nia uma foti direitu husi estudante sira neebe falta, maibe lo-loos kuandu estudante falta nia direitu fo ba estudante sira seluk neebe iha laos lori fali ba uma, tanba mata dalan merenda eskolar mak hateten.

(tom)