DILI, STLTIMORLESTE.com – Lezada ho inisial MM perdua arguidu ho inisial MB hanesan laen, maske hetan ameasa husi nia laen.
Iha loron Segunda nee, iha sala julgamentu laran Juiz prosesu Ersilia de Jesus deklara katak, krimi neebe akuza ba iha arguidu ho natureza semi publiku lei fo dalan atu bele dada fila, kuandu vitima ba iha prosesu nee aseita.
Iha sala julgamentu laran, Tribunal husu ba iha vitima ka lezada katak, hakarak dada fila krimi refere, razaun ida tanba domin hodi deside perdua nia laen.
Lezada deklara katak, perdua arguidu tanba domin, maibe husu ba iha arguidu atu iha futuru labele halo tan aktu krimi hanesan ameasa hodi halo lezada tauk.
Iha sala julgamentu laran arguidu deklara katak, durante hahu mosu krimi ameasa nee too mai agora, arguidu la ameasa tan lezada, sira hela hamutuk no moris hamutuk hanesan fen ho laen.
Arguidu mos promete iha Tribunal, sei la halo tan hahalok nee ba lezada ka ba ema seluk.
Rona tiha ida nee, prokurador no Defensor husu ba iha Tribunal hodi homologa prosesu nee, ikus mai Tribunal homologa prosesu nee no absolve arguidu husi krimi nee.
Nunee, ikus mai Juiz prosesu deside hodi abolve arguidu husi Instansia.
Tuir akuzasaun neebe iha, Ministeriu Publiku akuza arguidu ho krime amesa, tanba momentu neeba arguidu ameasa atu oho lezada halo lezada tauk hodi ba hatoo keixa.
Audensia julgamentu nee prezide husi Juiz Singular Erisilia de Jesus, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Marsal Mascarinhas.
(ter)
