DILI, STLTIMORLESTE.com – Cardeal husi Estadus Unidus Amerika (EUA), Robert Francis Prevost, anunsia ofisialmente hanesan Papa foun iha Kuarta (8/5/2025) no hili naran Leão XIV. Hili naran ida nee laos deit formalidade, maibe ho signifikadu no konsidera hanesan indikasaun konaba vizaun no politika durante nia mandatu.
Tuir espesialista sira, naran neebe Papa ida hili refleta karakter, espiritu, no prioridade neebe nia hakarak lori durante nia tempu hanesan lider Igreja Katolika. Iha tradisaun Katolika, la iha regra eskrita konaba naran Papa, maibe naran sira nee normalmente hanesan homenagem ba figura ka Papa sira antes neebe admiradu.
Tuir informasaun, naran neebe Prevost hili refere ba figura importante rua iha istoria Igreja Katolika, mak Papa Leão I no Papa Leão XIII. Papa Leão I, neebe lidera iha sekulu 5, konhesidu tan nia aten-brani hasoru ameasa politika, inklui wainhira nia konvense Attila the Hun (lider Huns nian, Grupu Nomada husi Azia Sentral iha tinan 434 – 453 era komum) atu la ataka Roma. Nia mos respeitadu hanesan pensador boot no defensor doutrina importante Igreja nian. Enkuantu, Papa Leão XIII, neebe lidera husi 1878 too 1903, mak hakerek ensiklika Rerum Novarum, dokumentu importante konaba justisa sosial no direitu traballador sira durante revolusaun industrial.
Husi istoria Paus Leão I no Paus Leão XIII, hili naran ida nee husi Robert Francis Prevost indika katak nia sei kontinua espiritu reforma sosial no reforsa doutrina Igreja hodi hasoru dezafiu mundu kontemporaneu, inklui desigualdade ekonomika, impaktu globalizasaun, no isu etika konaba teknolojia hanesan intelijensia artifisial.
Papa ba dala-267 nee hakarak tuir kaminhu lider sira neebe forte no progresivu, ho kombinasaun determinasaun hodi hasoru dezafiu global no kompromisu ba justisa sosial no reforma doutrina. Ida nee konfirmadu husi portavos Vatikanu, Matteo Bruni, neebe dehan katak naran “Leão XIV” refere klaramente ba doutrina sosial Igreja Katolika nian.
“Hili naran ida nee hatudu katak Papa Leão XIV sei foka liu ba isu sosial, inklui iha kontestu foun hanesan impaktu intelijensia artifisial no globalizasaun neebe la balansu,” dehan espesialista Vatikanu, Francois Mabille.
Aleinde nee, observador barak mos haree katak hili naran nee hanesan kontinuasaun espiritu neebe Papa Francisco lori, neebe konhesidu tan nia solidariedade ho povu kiak no nia luta hasoru injustisa global.
Husi Papa nain 266 antes Leão XIV, kuaze hotu-hotu hili naran foun wainhira sira eleitu. Tradisaun nee hahu pratika iha sekulu 11 hanesan sombolu kontinuidade no onra ba Papa sira antes nee. Maibe, desde metade sekulu 20, naran Papa sira uza barak liu hodi marka vizaun pesoal papal nian. Naran Leão rasik inklui iha lima naran neebe Papa sira uza barak liu, hamutuk ho João, Benedito, Gregoriu, no Klemens.
Naran Leão nee uza ona dala 13 iha tempu pasadu, no Papa Prevost sai hanesan ba dala 14.
(kcm/ces)
