DILI, STLTIMORLESTE.com – Maski loron seidauk sae loos, maibe tasi ibun sira hahu ona ho koor neebe la baibain, tanba laos koor matak husi ai hun sira, maibe koor moris husi roupa no ai funan neebe joven sira lori iha loron 14 Fevereiru nee, hodi halo tasi sira laos deit fatin atu rona laloran, maibe mos sai testamunha ka altar ba domin husi foinsae sidade Dili nian.
Iha ninin ida, haree joven feto ida tuur hela ho ninia belun diak, sira nain rua laos namoradu, maibe sira hili tasi atu selebra domin amizade.
“Ba ami loron domin 14 Fevereiru laos deit kona-ba namoradu, tanba tasi fo mai ami hakmatek atu bele konta istoria no hametin ami nia belun ka kolega neebe diak,” dehan Martinha de Araujo, neebe hemu no han hela nuu iha Jardim Motael, Sabadu (14/02/2026).
Iha fatin ketak, tasi ibun Komoro no Tasi Tolu mos la lakon ninia ambiente hakmatek, joven barak hili tur iha tasi ninin hodi konversa no rona muzika liu husi sira nia telefone no seluk tan. Tanba iha fatin tasi ibun domin la presiza ema neebe iha osan barak mak ba, maibe tasi ibun fo espasu ba ema hotu ho gratuita deit.
Entretantu loron Valentine laos deit joven sira mak haksolok maibe negosiante sira neebe faan sasan iha tasi ibun mos kontenti, hanesan Raimundo Martins da Costa neebe hatete, loron Valentine mak fuan ba sira nia moris, tanba sasan neebe nia faan iha karosa hotu lalais deit.
“Loron domin nee lori ksolok ba ami negosiante kiik sira, tanba joven sira sosa, dosi, bee no seluk tan, neebe halo ami senti domin nee iha ami nia bolsu laran mahar tiha,” dehan nia ho hamnasa furak.
Maski loron Valentine nakonu ho festa no ksolok, maibe mensajen ida neebe nafatin mosu mak kona-ba ambiente atu labele soe foer aribiru. Joven balu hatudu ona maturidade atu la soe foer arbiru, tanba sira hakarak tasi neebe sai sasin ba sira nia domin ohin nee nafatin mos no saudavel ba aban bainrua nian.
(car)
