DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu primeiru interogatoriu, deside aplika medida Aprezentasaun Periodika ba arguida ho inisial NCS, tanba arguida tata kolega nia inus.
“Tribunal aplika Medida Aprezentasaun Periodika ba arguida, atu aprezenta aan iha Eskuadra Polisia neebe hela besik ba, fulan ida dala rua hodi hein prosesu investigasaun,” dehan Defensor Publiku, Jose Maria Guterres ba STL iha Tribunal Dili, Sabadu (6/04/2025).
Nia hatutan, arguida Ministeriu Publiku promove ho krimi Ofensa Integridade Fizika Grave iha artigu 146. kazu nee akontese iha loron 14 fulan Fevereru 2025 iha autus notisia husi polisia neebe fo ba iha Ministeriu Publiku husu pedidu kapturasaun ba arguida nee rasik, no pedidu nee Ministeriu Publiku fo ba iha Tribunal no Juiz hasai mandadu kapturasaun.
Maibe arguida submete tiha ba iha 72 horas mak foin lori mai iha Tribunal hodi halao prosesu primeiru interogatoriu atu aplika medida ba arguida.
Nunee iha alegasaun Prokurador husu atu aplika medida Aprezentasaun Periodika ba arguida no defeza husu atu aplika medida koasaun kmaan no bele aprezentasaun maibe fulan ida dala ida.
Defeza nee aseita ho despaisu Tribunal nian no medida nee justu tuir kondisaun arguida nian. No arguida mos sei kolabora ho justisa, arguida sei halao servisu iha Timor Leste se arguida hakarak ba Indonezia arguida sei hatoo pedidu ida ba iha defeza no hatama ba iha Tribunal depois Tribunal hatun despaisu mak arguida foin bele ba.
Jose dehan tan, kronolojia husi problema nee tanba baku malu entre arguida ho lezada sira servisu hamutuk iha bar, arguida tata lezada nia inus kanek todan too halo operasaun. No bazeia ba lei orgaun ida isin nian kanek todan agravadu, bele fo agravante ba arguida.
No lezada fila ona ba iha Indonezia, maibe antes lezada ba bazeia ba iha memoria futuru Tribunal rona ona deklarasaun husi lezada nian, no investigasaun sei lao hela iha Ministeriu Publiku.
Prosesu nee prezide husi Juiz Turnu Arjentino Nunes, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku, Jose Maria Guterres.
(ter)
