DILI, STLTIMORLESTE.com – Komunidade iha Aldeia Terra Santa, Suku Madohi, kontenti ho Ministeriu Saude liu husi Servisu Saude Munisipiu Dili, neebe rega aimoruk fomigasaun iha komunidade sira nia uma laran, nunee labele kona moras dengue.
Komunidade Maria Soares dos Reis dehan, diak tebes ekipa saude sira mai rega fomigasaun tama too uma komunidade sira nian, nunee bele hamenus susuk dengue iha bairu nee. Aimoruk fomigasaun neebe iis forte nee bele hamate susuk sira. Iha tempu udan hanesan nee, bee nalihun iha estrada laran tanba bee dalan laiha, entaun susuk tolun mos barak.
“Ekipa sira mai rega iha aldeia ida nee, komunidade barak mak kontenti hodi loke odamatan ba ekipa saude neebe rega tama too uma laran, hodi nunee susuk sira iha uma laran mos bele mate hotu,” dehan nia bá STL iha Terra Santa, Tasi-Tolu, Tersa (10/02/2026).
Nia hatete, iha komunidade balun mak lakohi atu ekipa sira rega tama too sira nia uma laran no rega deit iha uma liur, tanba deit aimoruk fomigasaun nia iis. Maibe atu prevene moras dengue nee, nuudar komunidade tenke loke odamatan bá ekipa saude sira hodi rega fomigasaun nee.
Nunee mos komunidade Teresa Santos hatete, lakohi atu moras dengue nee kona, diak liu simu deit ekipa saude sira rega tama too uma laran, nunee bele hamenus risku moras dengue nian.
“Maluk balun mak la gosta ho aimoruk fomigasaun nia iis nee, maibe hau senti diak hela. Neebe bainhira ekipa sira mai rega nee, hau fo hatene kedas para rega tama too hau nia uma laran,” katak nia.
Nia afirma, diak liu rega hotu too uma laran para susuk sira nee mate no bulelu hotu. Se kuandu rega deit iha liur, susuk balun iha hela uma laran.
Antes ekipa sira atu mai rega, ekipa husi parte saude nian mai fo uluk avizu ba komunidade sira iha aldeia refere iha loron Sesta nee, tama sai tuir bairu hodi fo hatene ba komunidade sira. Nunee iha loron Segunda no Tersa nee ekipa saude sira hahu rega fomigasaun nee. Iha atividade komunidade barak mak kontenti hodi haruka ekipa saude rega tama too uma laran.
Aleinde iha Aldeia Terra Santa, ekipa Servisu Saude Munisipiu Dili mos kontinua halo fomigasaun iha Suku Camea, Aldeia Lases. Objetivu husi atividade fomigasaun nee kontinua halo hodi prevene no hamenus risku moras dengue.
(dom)
