DILI, STLTIMORLESTE.com – Funsionariu sira husi Eis Primeiru Ministru, Taur Matan Ruak hahu hasai ona sasan iha Gabinete Eis Titulares, neebe lokaliza iha Farol, Dili.
“Ho revogasaun Lei Estatutu Titular Orgaun Soberania neebe Parlamentu Nasional aprova ona iha semana kotuk, husi data nee kedas, Eis Prezidente Republika periodu 2012-2017, Taur Matan Ruak deside desmantela ona nia Gabinete Eis Titular neebe lokaliza iha Farol,” haktuir nota komunikadu imprensa neebe STL asesu husi pajina Facebook ofisial Eis Primeiru-Ministru, Taur Matan Ruak, Segunda (29/09/2025).
Eis Prezidente Republika nee mos deside ona sei la uza kareta estadu neebe atribui ba nia tuir Lei numeru 7/ 2007, loron 25 fulan Julhu kona-ba Estatudu Titulares Orgaun Soberania nian.
Aleinde nee Eis Gerilheiru FALINTIL tinan 24 nee mos hahu Segunda ohin suspende hotu enkontru sira neebe agendadu ona ho entidade relevantes oin-oin ba tempu indeterminadu.
Eis funsionariu sira mos hahu rekolha no aruma ona sasan privadu Taur Matan Ruak nian iha Gabinete Eis Titular nian, enkuantu hein karta ofisial husi Governu hodi entrega uma estadu.
Kona-ba seguransa husi PNTL (Corpo Seguransa Pessoal), Taur Matan Ruak sei hein despasu husi Ministru Interior bainhira mak dada fila CSP sira neebe fo eskoltu ba TMR fila fali ba sira nia unidade.
Enkuantu tuir lei estatutu Militar, Taur Matan Ruak hanesan Eis Jeneral F-FDTL, sei hetan nafatin seguransa pesoal husi Polisia Militar.
Nuudar sidadaun no lider, Taur Matan Ruak kumpri lei no tenke hatudu ezemplu ba sidadaun sira katak iha nasaun ne’e hotu-hotu iha lei nia okos no la iha ema ida iha lei nia leten.
Jornalista: Alberto Menezes
Editor: Xisto Mendonça
