DILI, STLTIMORLESTE.com – Daudaun nee folin foos nafatin sai preokupasaun, tanba Governu seidauk normaliza folin, maski taxa importasaun hatun husi 5% ba 25%.
Deputada Bankada PLP, Maria Angelina Sarmento husu esplikasaun ba governu kona-ba taxa impostu selektivu konsumu aplikavel, iha nee la mosu ona taxa impostu selektivu konsumu ba sasan sira inklui foos.
Tanba uluk mantein ho 2,5%, husi VIII Governu hasae ba 5%, IX Governu mai hatun ba 2,5%, maibe faktu iha merkadu hatudu katak, foos importadu neebe uluk taxa impostu selektivu konsumu 5% 20 kilo presu US$ 12, maibe bainhira hatun husi 5% ba 2,5 %, 20 kilo presu US$ 18, 25 kilo US$ 21, agora iha OJE 2025 nee la preve ona.
“Too iha neebe presiza normaliza presu foos, karik husi 2,5%, atu garante populasaun neebe moris laiha kbiit kompras atu sosa foos saku ida mos difísil, ate família uma kain 2 tau osan hamutuk hodi sosa foos saku ida. Maski hatun taxa importasaun maibe realidade foos folin karun nafatin”, katak Deputada Maria Angelina iha debate proposta Orsamentu Jeral Estadu (OJE) 2025, iha PN, Dili, Kuarta (20/11/2024).
Tuir nia, kontrolu Governu too iha neebe, tanba folin foos seidauk normaliza.
Hatan ba kestaun nee, Ministra Finansas (MF), Santina Viegas Cardoso hatete, kona-ba foos nian presiza halo reforsu iha parte kontrolu merkadu nee rasik, tanba nee bele utiliza dadus mai husi Alfandega, bainhira sira sosa foos husi fatin orijen, nunee mos solidariza ba kustu transporte hamutuk hira, transporte bá sirkulasi iha rai laran hira, nunee haree ba hamutuk hira hodi bele kontrola folin iha merkadu.
(gui)
