BAUKAU, STLTIMORLESTE.com – Tribunal Distrital Baukau (TDB) adia prosesu sumariu ba julgamentu kazu agresaun fiziku hasoru Padre Paroku, Parokia Santa Terezinha Kelikai, David Savio, SBD.
Defensoria Publiku Agostinha de Oliveira haktuir, tuir ajenda julgamentu sumariu husi TDB ba kazu neebe halo husi suspeitu inisial SdC hasoru vitima Padre Paroku, Parokia Santa Terezinha Kelikai, realiza iha loron 14 Maiu nee, maibe la konsege realiza, tanba vitima la marka prezensa.
“Ohin prosesu sumariu tama ba atu halo julgamentu, maibe lezadu la marka prezensa entaun Tribunal hadia fali ba dia 21 Maiu, oras tuku 02:00 loraik,” informa Agostinha de Oliveira ba jornalista sira iha Vila Nova, Baukau, Kuarta (14/05/2025).
Julgamentu neebe TDB hadia ba loron 21 Maiu nee ba kazu neebe involve husi suspeitu SDC, idade 34, hasoru Padre Paroku David Savio, SBD rezulta padre nia kamizola lees, neebe akontese iha kartoriu Parokia Santa Terezinha Kelikai, iha loron 12 Maiu.
Bazeia ba akontesimentu neebe iha, Defensoria nee konsidera nuudar krimi semi publiku, tanba nee depende ba keixa husi vitima Padre David Savio, SBD.
“Nee krimi semi publiku, se karik lezadu hakarak dada fali kazu nee entaun lejitimidade tomak iha lezadu nia liman,” Agostinha de Oliveira argumenta.
Entretantu julgamentu hadia ba loron 21 Maiu nee, prezide husi juíza Solana, reprezentante Ministeriu Publiku Bartolomeu Dias no suspeitu SDC hetan defeza husi Defensoria Publiku, Agostinha de Oliveira.
(tom)
