DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial EXR, tanba komete krimi hasoru lezada ho inisial SAS.
Julgamentu nee halao iha loron Segunda (20/01/2025), neebe prezide husi Juiz Singular Ana Paula Fonseca, Ministeriu Publiku reprezenta husi Prokurador Ozorio de Deus, arguidu hetan asistensia legal husi Defensor Publiku Jose Guterres.
Tuir akuzasaun neebe iha katak, iha loron 11 fulan Abril tinan 2023 arguidu ho nervozu fakar etu malirin ba lezada nia hirus matan, arguidu tebe kona iha lezada nia kelen sorin karuk dala ida, no uza tan botas sama lezada nia kelen ba rai ho makaas, arguidu basa lezada nia kanuruk dala ida no arguidu rakut lezada nia kabas dala ida.
Konsekuensia direita husi agresaun fiziku nee, lezada sente moras iha fatin neebe arguidu baku ba.
Tanba nee, MP akuza arguidu komete krime Violensia Domestika ho Forma Ofensa Integridade Fizika Simples neebe previstu iha artigu 145 husi Kodigu Penal.
Hatan ba akuzasaun neebe iha, arguidu deklara katak, momentu neeba arguidu fila husi rodajen motor, too iha uma lezada haruka arguidu ba sosa labarik nia susu been, maibe arguidu ba sosa fali jaket.
Ho nunee mak lezada nervozu koalia barak, halo arguidu mos sente la diak foti etu malirin fakar ba lezada no halo agresaun hasoru lezada.
Lezada mos haforsa tan akuzasaun neebe iha katak, arguidu halo duni agresaun hasoru lezada.
Rona tiha deklarasaun sira nee, iha alegasaun Prokurador mantein ho akuzasaun neebe iha, husu Tribunal atu kondena arguidu pena prizaun tinan 1 suspende ba tinan 1.
Enkuantu defeza husu Tribunal tetu sirkunstansia hotu no aplika pena neebe justu ba arguidu.
Rona tiha deklarasaun sira nee, Tribunal adia ba loron seluk hodi rona desizaun.
(ter)
