BAUKAU, STLTIMORLESTE.com – Tekniku Eletrisidade Timor Leste, Empreza Publiku (EDTL.EP) nuudar mos ekipa konjunta husi Autoridade Munisipiu Baukau, neebe sobu negosiante nain 879 nia baraka iha Merkadu Tuan Vila Nova no Vila Antiga, nain 1 hetan kanek iha parte seguransa nia klaran bainhira ezekuta hela servisu.
Tekniku EDTL.EP, Justino Barbosa Pereira hetan kanek iha merkadu Vila Nova, bainhira ezekuta hela orden hodi desliga linha eletrisidade.
Tuir Vitima Justino Barbosa Pereira konta, insidente refere akontese iha loron 09 Dezembru, tuku 03:40 lokraik, bainhira hamutuk ho ekipa konjunta husi Autoridade Munisipiu Baukau kompostu husi Funsionariu Servisu Diresaun Munisipal, Guarda Merkadu, Seguransa Sivil, Bombeirus, EDTL.EP neebe hetan apoiu seguransa husi Polisia, kontinua sobu no limpeza baraka negosiante sira nian iha Merkadu Vila Nova Besik Rotunda, nunee ezekuta servisu hodi desliga linha eletrisidade ba negosiante sira nia baraka, maibe hetan baku husi sidadaun balun.
“Sente triste tebes, hau nuudar EDTL kortes eletrisidade, bazeia ba despaisu servisu neebe mak ba instituisaun, momentu akontesimentu iha fatin akontese, iha mos seguransa hanesan PNTL ho ajente barak halo seguransa, maibe la halo prevensaun,” hateten vitima nee ba jornalista sira iha Suku Buibau, Tersa (10/12/2024).
Vitima nee konta, despaisu refere husi Autoridade Munisipiu Baukau neebe lidera ekipa konjunta refere husi Sekretariu Munisipal Planeamentu Investimentu No Dezenvolvimentu Integradu, Eduardo Filipe Ximenes no hetan seguransa husi Polisia Munisipiu Baukau, maibe bainhira situasaun nee akontese parte seguransa la halo kapturasaun ba sidadaun refere.
Sidadaun refere baku vitima Justino Barbosa Pereira ho aitonka neebe rezulta kanek iha parte ulun iha terrenu no transporta kedas husi ekipa ambulansia ba HoREX Baukau hodi hetan tratamentu husi mediku sira ho suku pontu 2.
Vitima Justino husu parte seguransa tenke halo kapturasaun ba sidadaun refere, tanba nia parte ezekuta servisu iha terrenu no hetan baku too raan suli, maibe parte seguransa too ohin loron seidauk halo kapturasaun.
(EST 2)
