DILI, STLTIMORLESTE.com – Tekniku husi Servisu Edukasaun Munisipiu (SEM) Ainaro kontinua halo identifikasaun kondisaun eskola sira neebe aat.
“Kona-ba konstrusaun foun, hau hanoin ami husi Ainaro hetan eskola rua, ida mak hetan apoiu husi UNICEF, husi kompanhia ba haree tiha ona, depois sei loke tender iha Dili, eskola 2 nee Pre Eskolar no Ensinu Baziku Filial, ita hein deit ninia tender kompanhia neebe mak manan bele hahu konstrusaun ona,” dehan Diretor Servisu Edukasaun Munisipiu Ainaro, Patricio da Costa Magno ba STL liu husi telefone, Kuarta nee (12/03/2025).
Nia dehan, tinan nee iha eskola rua, agora Pre Eskolar nee hetan apoiu husi UNICEF, Ida EBF nee mak husi Governu, kona-ba kondisaun eskola iha Munisipiu Ainaro nee barak, tanba daudaun nee tekniku sira halo identifikasaun foti dadus ba iha eskola sira.
“Agora daudaun ami nia tekniku sira halo hela identifikasaun ba eskola sira, atu nunee ita bele hatene lo-loos ita nian kondisaun eskola hira mak aat, presiza halo konstrusaun foun no hira mak presiza halo reabilitasaun, tanba nee tekniku sira sei foti hela dadus iha terenu, hotu tiha mak sei fo dadus kompletu mai ami,” katak nia.
Iha parte seluk, Diretor Servisu Edukasaun Munisipiu Manatuto, Patricio da Cruz Quintao hatete, kona-ba kondisaun eskola iha Manatuto, eskola balu ninia kondisaun diak ona, maibe balu mak presiza hadia, atu nunee bele kria kondisaun neebe diak ba estudantes sira uza ba ensinu aprendizajen.
(jac)
