DILI, STLTIMORLESTE.com – Eskola tekniku vokasional 16 mak hetan fundu operasional no 10 hetan konsesaun eskolar, 4 hetan subsidiu.
“Eskola tekvo kona-ba konsesaun eskolar nee, dala ruma ita fo deit ba eskola tekvo 10 deit, tanba restu nee tama iha fundu operasional eskola, depois ho subsidiu espesiál ba eskola lima seluk, tanba nee eskola tekvo 16 mak hetan fundu operasional, eskola 4 mak hetan subsidiu, maibe eskola seluk nee ita sei uza fundu operasional eskola mak eskola 16, no 4 mak subsidiu espesiál, 10 mak ita sei uza konsesaun eskolar, tanba limitasaun orsamentu ba tinan ida nee,” afirma Diretor Nasional Ensinu Tekniku Vokasional, Fernando Mouzinho Gama ba STL Kinta nee (26/02/2026).
Fernando hatutan, iha tinan 2027 karik buat hotu lao diak mak sei uza deit fundu operasional eskola, kona-ba eskola 10 neebe hetan konsesaun nee ninia prosesu tanba sei halo transferensia, no sei halo elaborasaun ba kontratasaun, no sei halo kalkulasaun ba dadus husi eskola sira.
“Iha fulan ida nee, se lae fulan Marsu ita bele halo kontratasaun hotu para orsamentu halo transferensia ba ita nian konta bankaria eskola nian, tanba orsamentu neebe ita iha nee eskola idak-idak loke nia konta bankaria, atu nunee orsamentu transfere direita ba ita nian konta bankaria eskola nian,” nia dehan.
Nia dehan, planu prioridade ba tinan ida nee mak tenke reforsa fundu operasional eskola katak, eskola hotu tenke hetan ona fundu operasional eskola, maibe laos konsesaun eskolar deit, tanba fundu operasional eskola nee ninia objetivu prinsipal mak la haree ba numeru estudantes, maibe haree ba nesesidade neebe iha.
“Ida neee mak foin daudaun ita tau orsamentu kada eskola 20 mil, tanba limitasaun orsamentu, ita propoin eskola 20, eskola 15 sei hetan fundu operasional,” katak nia.
Iha fatin seluk, Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembru Bekora, Tomas Pinto dehan, kona-ba konsesaun eskolar sira seidauk hetan, maibe relatóriu sira submete ona.
(jac)
