BAUKAU, STLTIMORLESTE.com – Kompanhia telekomunikasaun Telkomsel apoiu nesesidade bazika ba familia vulneravel uma kain 4, iha Munisipiu Baukau.
Koordenador Telkomsel area Baukau, Moises Emor Boavida esplika, atividade apoiu refere bazeia ba ezistensia Telkomsel nian iha Timor-Leste tinan nee ba dala 13, nunee inisia programa refere hodi apoiu familia vuneravel sira.
“Apoiu nee la barak maibe ami fuan ho laran haree ba ami nia moto katak, tulun malu servi ho domin, ami la haree ba montante maibe iha natoon apoiu ba inan aman sira” hateten Emor ba jornalista sira remata apoiu nesesidade bazika ba familia vuneravel iha Aldeia Osso-Ua, Suku Tirilolo Postu Baukau Vila, Munisipiu Baukau, Sesta (19/09/2025).
Programa apoiu nee Telkomsel realiza hetan ba dadus husi Ministeriu Solidariedade Sosial no Inkluzaun inklui halo indentifikasaun hamutuk ho Autoridade Suku, hafoin entrega ba benefisiariu uma kain ida iha Suku Buibau, ida iha Uailili, Osso-Ua inklui uma kain ida iha Berkoli Postu Venilale.
Maibe prosesu identifikasaun ba benefisiariu sira neebe parte Telkomsel halo hodi fo apoiu mak hanesan, benefisiariu ema uma kondisaun aat no rendimentu menus neebe presiza tebes atu apoiu hodi sustenta ekonomia familia.
“Ami nia apoiu nesesidade bazika nee hanesan fos, mina tein manu tolun no seluk tan neebe ami apoiu ba familia sira atu sustenta loron ida rua nian,” Emor akresenta.
Benefisiaria Virgina da Costa husi Aldeia Osso-Ua, Suku Tirilolo Postu Baukau Vila agradese ba apoiu refere husi Telkomsel, tanba bele hetan apoiu hanesan nesesidade bazika hodi sustenta nesesidade familia ba loron balun nian.
“Agradese neebe hatoo mai ami ami husu obrigadu barak, buat neebe fo ajuda auguenta ona loron sorin ami husu obrigadu barak ho kontente,” Virgina espresa.
Reprezentante Xefe Suku Tirilolo atual delegadu Aldeia Osso-Ua, Sebastião Belo agradese ba ekipa Telkomsel, tanba bele ajuda ona familia refere, maibe husu atu kontinua programa refere, tanba familia uma kain barak iha Aldeia Osso-Ua moris ho kondisaun hanesan.
“Ami husu Telkomsel labele lao too deit iha nee, tanba iha nee komunidade kbiit laek mos barak, nunee tinan seluk mai halo mudansa nunee fo apoiu fo ho domin,” dehan nia.
Entretantu programa Telkomsel apoiu nesesidade bazika refere realiza mos iha Munisipiu seluk inklui Baukau, ho tema tulun malu servi ho domin iha ambitu selebrasaun existensia Telkomsel ba dala 13 iha Timor Leste.
Jornalista: Tomas Reis
Editora: Carme Ximenes
