BAUKAU, STLTIMORLESTE.com – Rede telkomunikasaun husi Telkomsel neebe instaladu iha territoriu nasional hanesan amostra ba kliente sira iha area Betumutu, Suku Defawasi, Postu Administrativu Baguia, Munisipiu Baukau.
Xefe Suku Defawasi Salustiano Ximenes Guterres hateten, tore ba rede koneksaun telkomunikasaun tolu hanesan Telemor, Telkomsel no Timor-Leste parte kompanhia husi telkomunikasaun tolu refere harii ona tore tolu iha area juridiku Suku Defawasi nian, maibe husi tore tolu refere, tore ba linha telkomunikasaun Telemor no Telkomsel nian durante nee la fo vantajen ba kliente balu iha Defawasi, tanba labele asesu linha ba kontaktu.
“Tanba saida mak linha la diak nee kestaun tekniku ami labele hatene, fatin sira neebe la asesu mak Betumutu Defawasi nian, TT diak oituan Telemor ho Telkomsel mak la diak,” hateten Salustiano ba jornalista sira iha Defawasi, Kuarta (28/01/2026).
Autoridade Suku Defawasi nee katak, durante nee komunidade sira iha Suku kuaze maioria kliente ba linha telkomunikasaun tolu refere, maibe linha telkomunikasaun husi Telemor no Telkomsel la fo vantajen, tanba laiha linha kontaktu no asesu ba internet, enkuantu linha telkomunikasaun husi Timor Telekom diak maibe la dun estavel, tanba labele uza ba asesu internet.
Salustiano komenta, kondisaun refere fo impaktu ba komunidade kliente sira, tanba labele halo kontaktu ho familia sira iha rai liur no rai laran liu husi telemovel no via online.
“Bainhira ami prezisa entaun sai husi fatin lao ba dois kilometru hanesan nee fatin diak mak foin telefone diak, ami husu ba kompanhia telekomunikasaun tolu nee liu liu Telemor ho Telkomsel sira nia tore nee monta iha neebe mak diak hodi komunidade hotu hotu asesu ami husu mak ida nee,” Salustiano espresa.
Nunee mos kliente husi Suku Defawasi, Domingos Lopes akresenta, oferesementu linha telkomunikasaun husi Telemor no Telkomsel ba kliente sira Suku Defawasi seidauk kobre masimu, tanba iha parte balu kliente sira lao distansia dook hafoin asesu linha hodi halo kontaktu ho familia sira iha rai laran no rai liur, maibe parte kompanhia sira la tau atensaun ba preokupasaun refere.
“Iha neeba rede telefone la diak tanba komunika ba familia ruma ou asesu informasaun araska tanba rede laiha, se bele karik hadia rede iha neeba, tanba ami lao dook mak foin hetan rede, husu ba Governu halo oinsa diak ami bele asesu rede,” nia rekomenda.
Hatan ba kestaun nee, Koordenador Telkomsel area Baukau, Moises Emor Boavida agradese ba kliente Telkomsel neebe preokupa ho linha telkomunikasaun husi Telkomsel neebe seidauk kobre area hotu iha Munisipiu Baukau liu liu iha Suku Defawasi, tanba parte Telkomsel estabelese ona tore ida iha area refere, maibe seidauk fo satisfasaun ba kliente sira no rekoinhese kliente sira iha Suku Defawasi area Betumutu hela fatin klean nunee seidauk asesu linha ba telefone no internet.
“Sira nia protestu nuudar oportunidade ba ami planu ba oin iha tinan 2026 nee nia laran karik ami haree potensial neebe diak ami sei aumenta tan ami nia rede iha neeba laos iha Defawasi deit maibe iha area remotas hotu,” Emor katak.
(tom)
