DILI, STLTIMORLESTE.com – Estrada iha Atauro tinan barak ona iha, maibe too agora Governu seidauk tau alkatraun, nunee Ministeriu Obras publika (MOP), Samuel Marçal iha tempu badak sei ba vizita Atauro hodi haree direita estrada neeba.
“Neebe hau husu ba komunidade iha Atauro labele lakon esperansa, Governu iha ona planu, hau hanoin tasi nee tun oituan ona hau mos sei ba iha Atauro para haree direita sira nia estrada nee,” katak MOP, Samuel Marçal ba STL iha Palasiu Governu, Kinta (19/03/2025).
Aleinde nee, Ministru Obra Publika (MOP), Samuel Marçal dehan, labele kompara estrada Dili no iha fatin seluk liu-liu iha Atauro nee rasik, tanba nee ita tenke halo mobilizasaun husi Dili hafoin ba iha Atauro.
Iha parte ketak, Xefe Suku Maumeta, Jeje lopes Mouzinho hatete, Governu presiza tau alkatraun ba estrada iha kapital Autauro laran, tanba wainhira iha tempu udan rai dodok no iha tempu bailoron rai rahun barak hodi afeta ba komunidade sira nia saude.
“Ami ezije katak ba oin Governu presiza tau alkatraun, tanba tempu barak ona estrada nee iha, maibe tempu bailoron rai rahun makaas, entaun afeta ba komunidade sira nia saude,” katak Jeje.
Lideransa komunitariu nee afirma, iha tempu barak ona estrada nee iha, maibe estrada nafatin nunee hela deit, fiar katak ho prezensa Primeiru Ministru nia vizita ida nee rekomenda tuir ba katak diak liu ba oin, se estrada laiha buat hotu paradu no difikulta ba komunidade sira nia viajen ba suku ida ba suku seluk.
Entretantu tuir dadus populasaun iha Atauro hamutuk 12.400, iha suku (5) kompostu husi Suku Beloi, Suku Bikeli Makadadi, Makili no Vila Maumeta.
(EST 2)
