DILI, STLTIMORLESTE.com – Ministru Interior (MI), Francisco da Costa Guterres hateten, Komisaun Rekrutamentu sei anunsia rezultadu teste kadetes foun Polisia Nasional Timor Leste (PNTL) iha fulan Janeiru nee.
“Hau haree pratikamente atu kompleta ona, ita espera katak iha fulan ida nee ka fulan oin sira bele anunsia ona,” hatete Ministru Francisco Guterres da Costa ba jornalista sira hafoin remata audiensia ho Komisaun B iha Parlamentu Nasional, Dili, Kinta (22/01/2026).
Governante nee afirma, rezultadu klaru liu sei mai husi komisaun rekrutamentu neebe sei hatoo mos relatoriu ligadu ba rekrutamentu refere.
“Hau labele koalia bainhira, tanba hau labele intervein ba komisaun nia servisu, se lae hau nia kanuru tohar tama iha neeba, orsida rekrutamentu nee ladiak tanba deit kestaun politika,” nia haktuir.
Nia reforsa, rekrutamentu ba faze daruak nian sei akontese iha fulan Junhu ka Jullu tinan nee no nafatin aplika kriteria neebe daudaun nee utiliza, mais iha artigu balun neebe Tribunal Rekursu deklara inkonstitusional nee sei elimina.
“Tinan nee ita sei rekruta tan, ita sei lori ba konsellu ministru husu para rekruta tan 400 too 600, mantein kriteria, so ida neebe mak tribunal dehan inkonstitusional nee ita tau sees tiha mantein nafatin ho kriteria jeral neebe mak iha,” nia salienta.
Ministru mos haktuir, daudaun nee komandu PNTL hasoru difikuldade iha rekursu umanu, liuliu membru barak nee ho idade avansadu no balun kondisaun moras permanente. Tinan nee sei iha reforma ba membru sira neebe ho kondisaun moras permanente no idade avansadu sira.
“Sira atu reforma agora, sira 180 ital atu ba reforma tinan ida-nee,” Ministru hateten.
Fatin hanesan Prezidente Komisaun B trata asuntu Defeza, Seguransa, Negosiu no Estranjeiru, Domingos Augusto “Deker”, rekomenda ba Nonu-Governu liuliu Ministeriu Interior no Komandu Jeral PNTL hodi aumenta tan rekrutamentu ba membru Polisia foun.
“Ami bolu atensaun ba Ministeriu no Komandu atu aselera rekrutamentu ho razaun tanba rekursu umanu ba PNTL menus, ita-nia membru PNTL barak mak idade, balun moras temporal no balun mos moras permanente,” nia sujere.
Nia haktuir, MI no Komandu relata ona ba komisaun B atu halo rekrutamentu foun no membru PNTL neebe idade avansadu tenke halo ona reforma.
Entretantu, Komisaun B Parlamentu Nasional, halao audiensia ho Ministru Interior, Francisco da Costa Guterres no kargu xefia balun inklui Komandante Jeral PNTL, Komisariu Jeral, Henrique da Costa, iha Parlamentu Nasional.
(alb)
