DILI, STLTIMORLESTE.com – Tempu besik Prezidente Republika Jose Ramos Horta sei nomeia ema balun hodi asumi kargu Xefe Kaza Sivil Prezidensia Republika.
Prezidente Republika Jose Ramos Horta hatoo kestaun nee ba jornalista sira iha Palasiu Prezidensial Nicolau Lobato, Bairo Pite, Kinta nee (05/03/2026), hafoin fo pose ba Xefe Kaza Sivil Sesante Sejuina Maria Ferreira Gomes ba Vise Ministra Negosiu Estranjeiru no Kooperasaun (MNEK).
Xefe Estadu hatete, Xefe Kaza Sivil oras nee asumi fali ona kargu nuudar Vise MNEK, tanba nee tempu badak nia laran Prezidente Republika sei buka ema balun hodi asume fali kargu Xefe Kaza Sivil.
“Ohin kedas hau husu opinaun husi Primeiru Ministru, orsida hau haree ona desizaun se mak ba Xefe Gabinete, iha nee Timor ita bolu Xefe Kaza Sivil ida bee adidu militar Xefe Kaza Militar nee sira iha Portugal mak hatene buat sira nee, hau nia edukasaun profisional nee iha Amerika iha neeba hau rona mak Xefe Gabinete maibe iha Timor bolu fali Xefe Kaza Sivil,” dehan Prezidente Republika.
Tuir informasaun katak Senhor Alezandrinho mak sei troka Xefe Kaza Sivil Sesante Jesuína Maria Ferreira Gomes hodi asumi kargu nuudar Xefe Kaza Sivil nee los ka lae? Hatan ba kestaun nee Prezidente hatete, depois mak halo desizaun.
“Orsida mak halo desizaun bazeiadu ho konversa ho Primeiru Ministru,” dehan Prezidente Republika.
Antes nee Jesuína Maria Ferreira Gomes mak asumi kargu nuudar Xefe Kaza Sivil, lori esperiensia barak ba knaar ida nee, pozisaun ida neebe nia hetan nomeasaun husi Prezidente Jose Ramos Horta iha loron 11 fulan Julhu tinan 2023.
Maibe ohin 05/03/2026 simu pose husi Prezidente Republika Jose Ramos Horta hodi asumi fali kargu nuudar Vise Ministra MNEK.
(eme)
