DILI, STLTIMORLESTE.com – Jurista Timoroan konsidera tempu ona estabelese Supremu Tribunal Justisa (STJ), atu nunee justisa iha rai laran bele lao diak.
“Tenke estabelese ona Supremu Tribunal Justisa, tanba too agora Tribunal Rekursu mak halao hotu servisu, too ona tempu atu Supremu Tribunal Justisa ketak,” dehan Jurista Alexandre Corte Real ba STL, iha Dili, Sesta (27/12/2024).
Nia hatutan, tenke hari Supremu Tribunal Justisa (STJ) ketak atu idak-idak bele halao nia knaar, laos Juiz hanesan halao servisu ba iha TR no no STJ, ida nee servisu todan liu.
Tanba uluk foin ukun aan seidauk haree lai ba buat ida, tanba haree ba rekursu umanu, prosesu seidauk barak, maibe agora ukun aan tinan 24 ona ho ambiente neebe oin seluk ona. No iha deit TR oinsa mak garante katak, justisa nee lao, tanba nee presiza duni hari ona STJ.
Iha fatin ketak, Prezidente Tribunal Rekursu, Deolindo Dos Santos dehan, sei harii Supremu Tribunal Justisa (STJ) no mos Tribunal Primera Instansia iha Munisipiu haat.
“Sei harii STJ no mos Tribunal Primera Instansia iha munisipiu haat, hanesan Baukau, Vikeke, Bobonaro no Ermera,” dehan nia.
Nia dehan, kona-ba Tribunal Primera Instansia haat nian faze dezenhu hotu ona, no iha tempu badak bele lansa ho nia konstrusaun, maibe dezenhu ho modelu ida deit.
(ter)
