DILI, STLTIMORLESTE.com – Bainhira udan prejudika prosesu aprendizajen iha Eskola Sekundáriu Jeral (ESJ) nu. 4 Setembru Balide, tanba sala ualu (8) mak afeita ba inundasaun.
“Hau hanoin eskola nian difikuldade mak bainhira udan nee prejudika tebes ba prosesu aprendizajen, tanba mosu inundasaun iha ami nian eskola, liu-liu ami nian sala ualu (8) nee afeita ba inundasaun iha tempu udan, nee aprendizajen la lao, estudantes balun tenke fila ba uma, balun hatama tan iha turma seluk,” dehan Diretor ESJ nu. 4 Setembru Balide, Sergio A. da Cruz ba jornalista STL iha nia knaar fatin Balide, Kinta nee (26/06/2025).
Sergio dehan, difikuldade ida seluk mak hanesan baibain fo sai ona katak, eskola seidauk iha moru, neebe problema movimentu livre ba komunidade no estudantes sira, difikuldade seluk mak Quadro balun ladun diak ona, problema hirak nee husi eskola hatoo ona ba iha Ministeriu Edukasaun.
“Ami nian kaderneta eskolar sira nee sufisiente hela ba ami nian estudantes sira. Bainhira udan sala de aula nian baranda nee nakonu ho bee, nee oinsa mak estudantes sira bele halo aprendizajen iha sala neebe hau mensiona,” dehan nia.
Nunee mos Lucas Maia Moniz hanesan estudantes husi ESJ nu. 4 Setembru hatete, tempu udan sala ida andar nia kraik nee bee nakonu iha laran, no sira labele uza sala nee, tanba bee nakonu too baranda.
“Ami nian sala ida andar nia kraik besik estrada ibun, bainhira udan nee inundasaun bee tama too sala laran inklui baranda, dala ruma mosu inundasaun ami la halo aprendizajen, tanba sala ualu (8) mak bee nakonu,” tenik nia.
Iha parte seluk, Koordenadora EBF Vila Verde, Filomena Casmira hatete, ho osan manutensaun neebe kiik, maibe husi parte eskola rezolve neineik problema nee, atu nunee bainhira udan evita husi inundasaun.
“Hau hanoin ho osan manutensaun neebe kiik,.maibe husi parte eskola rezolve neineik problema nee, atu nunee bainhira udan evita husi inundasaun iha ami nian eskola, tanba ita hotu hatene Vila Verde nee sempre mosu Inundasaun,” nia esplika.
(jac)
