DILI, STLTIMORLESTE.com – Tempu uluk feto sira ho kapasidade natoon, maibe barani tebes kaer kilat tiru hasoru inimigu mane sira.
Deputada Bankada FRETILIN, Lidia Norberta dos Santos Martins dehan, koalia kona-ba FALINTIL, dala ruma ema hanoin katak mane deit, mais laiha. FALINTIL iha kreasaun inisiu inspirasaun mai husi feto maluk balun.
“Ita haree movimentu feto sira neebe kaer mos kilat hasoru mane, liu-liu iha momentu markante ida mak saudoza Maria Tapo, ida nee importante tebes, ita tenke hanoin katak Saudoza Maria Tapo ninia mate sai data istoria ba Timor halo loron nasional ba feto, Saudoza Maria Tapo nia mate sai mos kontribuisaun ida bainhira komemora loron FALINTIL, hanoin ba nia katak feto maluk ida neebe mak kaer mos kilat hasoru inimigu sira,” dehan nia ba jornalista iha Salaun UCT Balide, Sesta (22/08/2025).
Nia hatete, iha ai laran feto barak mos kaer kilat, maske iha tempu neeba feto barak la eskola, sira ho Konhesimentu neebe minimu maibe sira nia hanoin luan tebes, sira hamutuk ho mane maluk sira kaer kilat hodi luta ba ukun rasik aan.
“Ho nunee ita haree partisipasaun feto iha funu nee importante tebes, tanba buat neebe mane sira halo sira mos halo, mezmu iha limitasaun sira buka atu kontribui, ho nunee mak kontribuisaun feto iha luta ukun rasik aan sai mos inspirasaun ba feto maluk sira ohin loron nian, no iha faze ukn aan nee ita tenke haree katak iha faze kontribuisaun importante nafatin,” katak Deputada nee.
Nia dehan, ohin loron feto barak inklui iha area oin oin hanesan Jornalista, Edukasaun, iha saude no seluk tan, ida nee hatudu katak feto mos halo buat hotu.
Eis Prezidente Autoridade Munisipiu Dili, Guelermina Filomena Saldanha hatete, dezafiu neebe feto sira hasoru lakohi hatete, parseru mane barak la apoiu sira, barak komesa konsiente katak nee importante tebes maibe ida nee latoo tanba saida. Tanba sira difisil atu husik feto sira foti desizaun sira, hanoin feto sira mai atu halo fali kompetisaun ba sira.
Nia katak, tempu ukun aan nian, tempu dezenvolvimentu presiza tebes feto mane kaer liman hamutuk halo servisu.
Dezafiu neebe hasoru mak momentu ida agora ba dezenvolvimentu, feto sira mos buka hamosu ona aan iha area sira seluk, liu liu iha area empoderamentu feto barak lidera ona empreza.
(eme)
