DILI, STLTIMORLESTE.com – Ministru Justisa, Sergio Hornai rekonhese oras nee daudaun prizaun sira tau kondenadu barak ona, tanba nee planu atu kria tan Sentru Juvenil no sei haree mos ho prizaun ida iha Weberek.
“Ita rekonhese dehan iha over katak, iha sobre pozisaun iha fatin neeba, ita buka oinsa mak atu bele esforsu, komesa haree daudaun Sentru Juvenil tenke estabelese,” dehan Ministru Justisa, Sergio ba jornalista sira iha Kolmera, Dili, Tersa (04/02/2025).
Nia hatutan, sira neebe ho idade minoridade tenke ba iha fatin ketak, atu menan tan formasaun, atu hasai sira nia konhesimentu, atu kuida sira simu ona responsabilidade, ka sira neebe tau daudaun iha fatin neeba atu eduka sira, bele sai ba iha sira nia familia no sosiedade ho diak, tanba nee sei tama uluk ba iha Sentru Juvenil.
Iha mos fatin ida iha Weberek, atu nunee lori ema sira neebe iha kondenasaun difinitiva atu sira bele hasai sira nia abilidade liu husi area neebe iha, atu sira rasik bele fo han ba sira nia aan, no mos bele hetan tan esperiensia husi atividade neebe sira halo.
Iha fatin ketak, Jurista Jose Maria Guterres dehan, tenke harii sentru ida ketak hodi tau dadur neebe sei ho idade joven, labele tau sira hamutuk ho dadur neebe ho idade boot.
“Presiza kria fatin ida ketak hodi tau dadur sira neebe ho idade kiik, maske sira komete krime tau sira iha fatin ketak, ho formasaun ketak ba sira oinsa bele muda sira nia hanoin, atu sai iha liur labele halo tan krimi, “dehan nia.
(ter)
