DILI, STLTIMORLESTE.com – Tenke estabelese ona Supremu Tribunal Justisa, atu nunee desizaun neebe husi Tribunal Rekursu neebe fo sai parte sira la konkorda, bele rekore tan ba iha Supremu Tribunal Justisa.
“Ita tenke estabelese ona Supremu Tribunal Justisa, ida nee tenke iha, se lae parseiru sira iha problema iha Tribunal Primeira Instansia ida manan ba too iha Tribunal Rekursu ida lakon ida manan, atu ba tan la iha ona, tanba nee justisa nia estrutura tenke too iha Supremu Tribunal Justisa, atu nunee Justisa nee too ida ikus nee,” dehan Komisariu KAK, Rui Pereira ba jornalista sira iha MNEC, Tersa (27/05/2025).
Komisariu hatutan, kuandu iha ona Supremu Tribunal Justisa kazu sira neebe parte balu la konkorda, bele rekore ba iha nee hodi haree kona-ba desizaun neebe iha.
Iha fatin ketak, Jurista Sergio Dias Quintas hateten, Supremu Tribunal Justisa kuandu estabelese ona Supremu Tribunal Justisa nee sai hanesan pasu ida nebee diak hodi kompleta hirarkia Tribunal nian.
“Diak liu tanba bele kompleta irarkia Tibunal hodi justisa ida neebe kompleta,” dehan Jurista Sergio.
Nia hatutan, importante atu estabelese Supremu Tribunal Justisa, tanba ita nia konstituisaun mos fo dalan, ho ida nee tau esperansa iha tempu badak bele harii.
Antes nee Prezidente Republika Jose Ramos Hora deklara katak, nia mandatu termina sei estabelese Supremu Tribunal Justisa.
(ter)
